nepal life

जापानलिसे ब्यापार साझेदार यायेगु सम्भावनाया विषयस निन्हुयंकं कार्यशाला गोष्ठी

नेवा: अनलाइन न्युज | २०७४ पौष १६, आइतबार १८:२०:०६

–उपेश महर्जन

नेपाः लिसेंया खाद्यवस्तुत जापानय् बजाः विस्तार यायेत दकले गुणस्तरय् ध्यान बिइमाःगु निष्कर्ष पिकाःगु दु ।

नेपाल, भुटान व भारतपाखें स्याउ, सुन्तला, फःसि, दाल, जाकि, पालु, वाउँगु तरकारी, प्याज जापानय् निर्यात यायेफइ ।

खाद्यवस्तुतय्गु गुणस्तरतां मू निर्धारण जुइगु धासें नेपाः लिसेंया खाद्यवस्तुतय्गु बजाः प्रणाली वहे कथं निर्धारणय् बः ब्यूगु दु ।

आः नकतिनि येँय् क्वचाःगु भारतीय उपमहाद्विपय् खाद्य बजाः प्रणालीया विकास व जापानलिसे ब्यापार साझेदार यायेगु सम्भावनाया विषयस निन्हुयंकं कार्यशाला गोष्ठीं उगु निष्कर्ष पिकाःगु खः ।

गोष्ठीइ जापान, नेपाल, भारत व भुटानया १७ गू खाद्य व अर्थशास्त्रीपिनिगु ज्यापौया निचोड पिकाःसें हिरोसिमा विश्वविद्यालयया प्राध्यापक केशवलाल महर्जनं जानकारी बियादीगु खः ।

दुर्गमया खाद्यवस्तुयात सुगम क्षेत्रय् हयेगु नितिं यातायातया सहज सुविधालिसें भौतिक पूर्वाधारया विकास यायेमाःगु, उचित भण्डारणलिसें नीतिगत निर्णय यायेत आवश्यकताय् बः ब्यूगु खः ।

किसानयात उचित मूल्य बिइमाःगु, किसान व उपभोक्ता दथुया माध्यमय् दइगु ठेकेदार व साहु दथुया आर्थिक दुरी म्हो यायेमाःगु, कमिसन एजेन्टपिन्त निरुत्साहित यायेमाःगु लिसेंया निर्णय नं उगु गोष्ठीं याःगु दु ।

मंकाः रुपं त्रिभुवन विश्वविद्यालयया प्राकृतिक विज्ञान संग्रहालय, हिरोसिमा विश्वविद्यालय, जापानय् च्वंगु खुल्ला विश्वविद्याल व नेपाल विकास अनुसन्धान प्रतिष्ठानं कार्यशाला आयोजना याःगु दु ।

कार्यशालाय् प्राध्यापक महर्जन व दिल्ली विश्वविद्यालयया विनु सुन्दासं दिल्लीइ च्वंगु कृषि बजाः प्रणाली व थोक बजाः व सिलगुडी व जःखतय् च्वंगु फलफूल व तरकारी बजारीसम्बन्धी निगू ज्यापौ न्ह्यब्वःगु खः ।

फुकुइ विश्वविद्यालयया प्राध्यापक तोसिहिरो त्सुकिहारां हिमाली क्षेत्रय् दूगु कृषि उत्पादन व खाद्य व्यापारसम्बन्धी, खुल्ला विश्वविद्यालयया प्राध्यापकपिं निम्ह अकिनोबु कावाई व हिसाटारो होरियुचिं भुटान व नेपाः सम्बन्धी कृषिबजाः, टोकियो कृषि विश्वविद्यालयया प्राध्यापक हिरोजी फुजीसिमां ज्यापौ पेश यानादीगु खः ।

भुटानया कृषि व वन मन्त्रालयया कृषि बजाः संयोजक दोर्जी रिङचेन, कृषि विकास मन्त्रालयया वरिष्ठ कृषि अर्थविद् बासुदेव काफ्ले, नेपाल चेम्बर अफ कमर्स व उद्योगस्थित एग्रो इन्टरप्राइजेज सेन्टरया कार्यकारी प्रमुख प्रदीप महर्जन लिसेंया पिन्सं ज्यापौ पेश यानादीगु खः ।

Categorized in बजाः