nepal life

जापानय् मिस एण्ड मिसेस नेपाल–२०१८ जुइगु

नेवा: अनलाइन न्युज | २०७४ पौष १९, बुधबार १०:१५:२८

नेपाःया कला संस्कृतिया जगेर्ना व बौद्धिक लिसें अन्तरक्षमताया विकास याकेगु आज्जुं जापानय् न्हापांगुखुसि मिस एण्ड मिसेस नेपाल–२०१८ याइगु जूगु दु ।

नेपालय् ताःई न्ह्यवःनिसें सौन्दर्य कासा यानाः वयाच्वंगु पल इन्टरटेन्मेन्ट व जापानया सिन्जोउ कर्पोरेशनया मंकाः ग्वसालय् टोकियो महानगरपालिकाया इतावासी शहरय् च्वंगु ओया ग्रिनहलय् १८ फेबु्रअरी २०१८ स ज्याझ्वः याइगु जूगु दु ।

ग्वसाः खलःया कथं कला संस्कृतिया प्रचारप्रसार व सौन्दर्यता, व्यक्तित्व, अन्तरक्षमताया विकासया नितिं व्यावसायिक रुपं नेपाःया मिसापिं धेंधेंबल्लाय् क्वाहाँ वयेत्यंगु खः ।

धेंधेंबल्लायात पारिवारिक व विद्यार्थी भिजाय् जापानय् च्वनाः वयाच्वंपिं नेपाःया मिसापिन्सं नेपाःया कला संस्कृति, सुन्दरता बौद्धिक प्रतिभालिसें अन्तरक्षमताया थीथी १५ गू विधाय् धेंधेंबल्ला याइगु जूगु दु ।

न्हापांगु चरणया छनोट प्रक्रिया १ फेब्रुअरी व उत्कृष्टताया आधारय् लिपांगु छनोट १८ फेब्रुअरी २०१८ स याइगु जुइ ।

अडिसनय् छनोट जूपिन्त ३ फेब्रुअरीपाखें फिटनेश, सेल्फ मेकअप, न्हिलासु, फोटो सेसन, मिडिया सम्बन्धी जानकारी व स्टेज पफर्मेन्स, क्याटवाक व मानव संशोधन लिसेंया विषयस तालिम बिइगु ग्वसाः खलः सिन्जोउ कर्पोरेशनया प्रबन्ध निर्देशक उत्तमकुमार श्रेष्ठं जानकारी बियादीगु दु ।

थःगु हे ब्यागलं क्षमताया आधारय् न्हाप, ल्यू व लियांल्यू जूपिं ब्याहा जुइधुंकूपिं व ब्याहा मजूनिपिं निगुलिं विधाया विजेतां नगदलिसें म्यूजिक भिडियो व स्थानीय मिडियाय् ह्वःताः चूलाइ ।
छनोट विवादरहित यायेत नेपाःपाखें सम्बन्धित क्षेत्रया विज्ञ व जापानपाखें नं प्रतिनिधि सहभागी दइगु जानकारी ग्वसाः खलकं ब्यूगु दु ।

ज्याझ्वःया व्यवस्थापन याःगु डेस्टिनी क्रियसनया असिम बस्नेतया कथं ताःई न्ह्यःनिसें जापानय् च्वनाः वयाच्वंपिं नेपाःमिं कला संस्कार ल्यंकातयेगु वसः तिसा ज्वलंनिसें रंग, गुन्यु–चोलो व तिसातय्गु ब्वज्या जुइगु जानकारी नं ब्यूगु दु ।

Categorized in अन्तर्राष्ट्रिय