nepal life

जाँच लिछ्यायेगु नितिं निर्दोष मचाया हत्या !

नेवा: अनलाइन न्युज | २०७४ कार्तिक २३, बिहिबार १३:१३:३७

भारतया हरियाणाय् च्वंगु रायन इन्टरनेशनल स्कूलय् अनया विद्यार्थी प्रद्युम्नया छुं ई न्ह्यः जूगु हत्याय् सनसनीपूर्ण खुलासा जूगु दु ।

हरियाणा प्रहरीं स्कूल बसया कन्डक्टरं यौन शोषण यानाः प्रद्युम्नया हत्या याःगु निष्कर्षयात खारेज यासें सेन्ट्रल ब्युरो अफ इन्भेस्टिगेसन (सीबीआई) नं उगु मामिलाय् स्कूलयया ११ तगिमय् ब्वनीम्ह मचायात हिरासतय् काःगु दु ।

सीबीआईया दाबी कथं, उम्ह विद्यार्थीं स्कूलया जाँच व अभिभावक शिक्षक बैठकयात ‘तारेयायेगु’ नितिं प्रद्युम्नया हत्या याःगु खः ।

आरोपित विद्यार्थीपिन्त न्हिनय् जुभेनाइल जस्टिस बोर्ड न्ह्यःने पेश याःगु दु । उम्ह ११ तगिमय् ब्वनीम्ह विद्यार्थीं अपराध कबुल यायेधुंकूगु सीबीआईया दाबी दु । सीबीआई सूत्रया कथं, आरोपित विद्यार्थी याकनं तंम्ह्वइम्ह व मानसिक रुपं कमजोर कथंया मनू खः । वया वासः यायेगु ज्या जुयाच्वंगु दु । अनुसन्धान नियोगया अधिकारीया कथं, उम्ह विद्यार्थीयात शंका सीसीटिभी फूटेज स्वयाः सीकूगु खः ।

फूटेजय् सुयागु नं ख्वाः प्रष्ट खनेमदूसां नं प्यम्ह मनूतय्त शंका जूगु खः । प्यम्हेसिके नं न्यनेकने यायेधुंकाः आरोपित विद्यार्थीं अपराध कबुल याःगु खः ।

सीबीआई नं अनुसन्धानया झ्वलय् स्पट रिकन्स्ट्रक्सनया ज्या याःगु खः । आरोपित विद्यार्थीं अपराधया विषयस पासापिन्त जानकारी ब्यूगु सीबीआई नं धाःगु दु ।

जाँच ‘तारेयायेगु’ नितिं जिं छुं याये धकाः उम्ह विद्यार्थी धाःगु जुयाच्वन । सीबीआईया कथं विद्यार्थीं प्रद्युम्नया हत्याय यायेधुंकाः चक्कुयात फ्लश याःगु खः ।

तर आरोपित विद्यार्थीया अबुम्हं धाःसा थः काय्यात हथासं फसेयाःगु धाःगु दु । अबुम्हेसिगु कथं, व व वया काय्यात मंगलवाः बहनी ताःहाकःगु ईतक सीबीआईया अधिकारीपिन्सं न्यनेकने यानाः काय्यात हिरासतय् काःगु खः । सीबीआई नं तःक्वःमछि छेँय् वयाः जाँचबुझ याःगु व मचाया ब्यागलिसें मेमेगु स्कूलया सामान जफत याःगु वं धाःगु दु ।

Categorized in अन्तर्राष्ट्रिय