nepal life

जनार्दश शर्मायात लक्षित यासें रुकुमय् बम प्रहार

नेवा: अनलाइन न्युज | २०७४ कार्तिक २४, शुक्रबार १५:०६:४०

रुकुमय् नेकपा एमाले व माओवादी केन्द्रया मंकाः वामगठबन्धनया पाखें प्रतिनिधिसभा दुजःया उम्मेदवार जनार्दन शर्मायात लक्षित यानाः बम प्रहार याःगु दु ।

शर्माया प्रचार पुचःयात लक्षित यानाः रुकुमया चौरजहारी नगरपालिका–८ या गोइरीइ निगः बम प्रहार याःगु खः । बम प्रहार जूसां नं छुं घटना धाःसा मजुल । चौरजहारी उपत्यकाया चुनावी सभा, घरदैलो व नापलायेज्या क्वचायेकाः सानीभेरी गाउँपालिकाया सिम्ली वयाच्वंगु प्रचार पुचःयात सतक च्वय् पाखें सुतली बम प्रहार जूगु उम्मेदवार शर्माया ग्वाहालिमि बसन्त शर्मां जानकारी ब्यूगु खः । बम सुनां क्ययेकूगु खः, व धाःसा म्हसीके मफूगु प्रहरीं जानकारी ब्यूगु दु ।

जिल्ला प्रहरी ज्याकुथि रुकम (पश्चिम)या प्रमुख डिएसपी राजेन्द्रप्रसाद धमलां घटनाय् दुथ्याःगु पुचः व व्यक्तिया मालेगु ज्या जूगु धाःगु दु । बम बिप्लव नेतृत्वया नेपाल कम्युनिष्ट पार्टीया कार्यकर्तापिन्सं प्रहार याःगु आशंका याःसां नं पुष्टि जुइ मफुनि ।

थ्वहे दथुइ उम्मेदवार जनार्दन शर्मा व वय्कःया प्रचार पुचःयात लक्षित यानाः जूगु बम प्रहारया ज्याप्रति एमाले–माओवादी पार्टी एकता संयोजन समिति रुकुम (पश्चिमं) विरोध याःगु दु ।

छगू विज्ञप्ति सार्वजनिक यानाः समितिं उम्मेदवारपिन्त लक्षित यानाः बम प्रहार यायेगु देसया विकास व समृद्धिया विरुद्ध जूगु धाःगु दु ।

Categorized in दुर्घटना-अपराध