nepal life

जनकविया डिभिडि पिदन ःलोककविया बुदिं हन

नेवा: अनलाइन न्युज – ललेन्द्र शाक्य | २०७४ मङ्सिर १९, मंगलबार १३:२६:२१

म्हिगः ने.सं.११३८ थिंलागा पारू सोमवार तुयु लुमन्ति दबूसं अतिकं लोकं ह्वाःम्ह लोककवि राजभाइ जकःमिजुया ख्वीकःगु बुन्हि हन । वय्कःया बुन्हि लाकाः जनकवि दुर्गालाल श्रेष्ठजुया थीथी लोकंह्वाःगु कविताया थःगु हे सलय् भिडियो चक्का पिथनेगु ज्याझ्वः जुल ।

थुगु ज्याझ्वः प्रतिभा साहित्य परिवार व जकःमि हःपाः दबूलिं ग्वसाः ग्वगु खः । थुगु ज्याझ्वलय् स्वनिगःया साहित्यकःमि, कलाकार, संगीतकःमि, थीथी पत्रकार, वुद्धिजिवीपिनिगु नं उपस्थिति दुगु खः ।

ज्याझ्वलय् जकःमिजुयात खेँ सगं बियाः खादां क्वखायेकाः हनेज्या जुल । ज्याझ्वलय् जनकवि दुर्गालाल श्रेष्ठं, नरेश ताम्राकार, डा. तुयू बहादुर महर्जन, न्हुछेबहादुर डंगोल व पुलांम्ह राज्यमन्त्री दिलीप महर्जनंपिन्सं भिंतुना नापं थःगु नुगः खँ तयादीगु खः ।

लोककवि राजभाई जकःमिजुं जीवनय् थःत यःपिं स्वम्ह गुरूपिं साहित्यकार ईश्वरानन्द श्रेष्ठाचार्य, संगीतकार शुकराम महर्जन व जनकवि दुर्गालाल श्रेष्ठपिनिगु जलय् च्वने दयाः थौं थुगु थासय् थ्यंकेफुगु खँ कनादिल ।

जनकवि दुर्गालाल श्रेष्ठं थः शिष्य राजभाई जकःमिया बारे च्वयातःगु भिंतुना कविता न्यंकादीगु खःसा अथेहे, जकःमिजुं नं जनकविया व्यक्तित्व बारे च्वयादीगु कविता न्यंकादिल । लिसें उगु ज्याझ्वलय् जकःमिजुं थ्व डिभिडि निर्माण यायेत व व्यवस्थापन यायेत तूगु ७०,००० तका दां जकःमि हःपाः दबूया नामं थःम्हं ग्वाहालि यानागु लसताया सुचं न्यंकादीगु खः ।

ज्याझ्वःया मूपाहाँ नेवाः देय् दबूया नायः नरेश ताम्राकारजुं जनकवि व लोककवि छथाय् तयाः थःम्ह हनापौ व भिंतुनापौ देछायेखंगुलिं थः भाग्यमानी जुयागु खँ न्ह्यथनादिल ।

थथेहे, जकःमि हःपाः दबूया दुजः न्हुच्छेबहादुर डंगोलजुं लोककवि जकःमिया व्यक्तित्व व कृतित्व राष्ट्रिय व अन्तर्राष्ट्रिय स्तर थ्यंक च्वन्ह्याकेगु हे थुगु हःपाः दबूया मू आज्जु खः धकाः धयादिल ।

उगु ज्याझ्वलय् किपू नगरपालिकाया मेयर रमेश महर्जनं नेपालभाषा उत्थानया नितिं किपू नगरपालिका धिसिलाक्क न्ह्याःवनेगु खँया जानकारी बियादीगु खः ।

ज्याझ्वः म्येहालामि मय्जु रिता महर्जनजुं न्ह्याकादीगु खः । सभाया नायः भाजु ज्ञानबहादुर महर्जनं प्रतिभा साहित्यया बारे न्वंवासें नेपालभाषा ख्यलय् छगू ऐतिहासिक पलाःया रुपय् थुगु डिभिडि चाः जुइगु खँय् बः बियादिलसा थुकियात थीथी खलः पुचःलिसें भाषाह्यःमिपिन्त न्यानाः कयादीत इनाप यासें ज्याझ्वः क्वचायेकादीगु खः ।

किपाः रानीशोभा महर्जन

Categorized in नेवाः