nepal life

छपला चुलुल कि अस्थीरताया राज उपेन्द्र नं प्रधानमन्त्री जुइफु

नेवा: अनलाइन न्युज | २०७४ पौष २९, शनिबार २२:२१:१६

सानुराजा शाक्य
प्रतिनिधिसभा व प्रदेशसभाया निर्वाचित सभासद्त थौंकन्हे फुर्सदय् दु । थ्व फुर्सदया ई बधाई कायेगुलिइ खुब उपयोग जुयाच्वंगु दु । बधाई ज्याझ्वलय् वनाच्वंसा आलोचना यायेमाःगु अवस्था मदु । न्हापा जुल धाःसा चुनाव क्वचाया उलिमछि दयेधुंकल ज्या मयासे बधाइ नः जुल धकाः आलोचना जुइगु खः तर थुगसी धाःसा सरकारं हे निर्वाचित सभासद्तय्त सपथ ग्रहणया ज्याझ्वः हे मयाकूसे तयातःगुलिं सभासद्त फुर्सद च्वने दुगु खः । सरकारयात नं सपथ ग्रहण यानाः सरकार लःल्हायेत प्राविधिक रुपं कानुनी व मेमेगु कारणत क्यना लिबाका च्वंगु दु । थुकिं यानाः सरकारया प्रधानमन्त्री व मन्त्रीत नं थःगु कार्यकाल छुं भचासां ताःहाके दयाः दंगः जुयाच्वंगु खनेदु ।
थ्व फुर्सद ईया मौका लाका दलतसें यायेमाःगु ज्याय् नं खास हे ध्यान वनाच्वंगु मदु धाःसां जिउ । चुनाव न्ह्यः गठबन्धन दयेकाः चुनाव ल्वाःपिं एमाले व माओवादी केन्द्रं छगू हे घोषणा पत्र पिकयाः जिपिं चुनाव धुंकाः पार्टी एकीकरण यानाः हे वनेगु घोषणा यानाः चुनावय् वंगु खः । थुकिया लिच्वः कथं वाम मतदातात खुसी जुयाः राजनीतिक स्थिरता वइगु खनाः वामगठबन्धयात जनतां झण्डै दुई तिहाइया मत बिल । मेखे प्रादेशिक तहलय् नं दुई नम्बर प्रदेश बाहेक अत्यधिक बहुमत बिल । गठबन्धनया राजनीति सहज रुपं वन धाःसा मेगु न्यादँ अःपुकः हे संघ प्रदेशय् वाम गठबन्धनं सरकार न्ह्याकी । उकथं हे दुई नम्बर प्रदेशय् गठबन्धन दयेकाः चुनावय् वंगु संघीय समाजवादी फोरम व राजपायात प्रदेश सरकार अःपुक दयेके फइगु कथं बहुमत वःगु खः । चुनावया इलय् एमाले माओवादी केन्द्रं थःपि पार्टी एकता यायेगु घोषणा याःथें मधेसय् संघीय फोरम व राजपा मध्ये राजपाया नेतातसें चुनावी प्रचारया इलय् संघीय फोरमनाप चुनाव धुंकाः पार्टी एकता यायेगु थाय्थासय् न्ववाःगु खनेदुसा मेखे संघीय फोरमया मधेसी नेतातसें राजनीति असंभव धइगु मदु धाःसें एकता ताःपाःगु हे मखु तर एकताया नितिं छुं आधारमाः धकाः धायेगु याःगु खनेदु । चुनाव ज्वःछि राजपा नापया एकताया विरुद्ध खास हे न्वमवाःसां चुनाव धुंकाः धाःसा राजपाया खुम्ह नेता खुथाय् हे दनीगु न्ववासें संघीय फोरमया नायःपाखें एकीकरणया संभावनायात अस्वीकार याःगु खनेदत । थौंकन्हे राजपा संघीय फोरमया दथुइ सहकार्य ताःपानावंगु संकेत कथं सरकारं कन्हे दुई नम्बर प्रदेश प्रमुखय् मनोनयन यायेत राजपां छम्ह व संघीय फोरमं मेम्ह हे नेतायात सिफारिश याःगु बुखँ दुई नम्बर प्रदेशय् संघीय फोरम व राजपाया मंकाः सरकार तकं संभावनां ताःपाःगु खःला धइगु राजनीतिक वृत्तय् चर्चा शुरु जूगु दु ।
मेखे कन्हय्या संघीय सरकारय् संघीय फोरमयात तकं हयेगु संभावना चायेकेगु कुतलय् एमालेया नायः व संघीय फोरमया नायः दथुइया खँल्हाबल्हां दुई नम्बर प्रदेशय् वाम गठबन्धन नाप जानाः संघीय फोरमया नेतृत्वय् सरकार दयेके फइगु संभावना नं दुगु खँ एमाले व फोरम दुने छलफलया विषय जूगु खनेदु । दुई नम्बर प्रदेशय् राजपा नाप संघीय फोरमया एकताला यक्व हे ताःपाःगु खँ जुल नापं सरकार दयेकेगु संभावना तकं स्यनीगु अवस्था राजपाया नेतातय्गु कारणं जुइफइगु आशंका संघीय फोरमया नेतातय्के दुगु खनेदु । राजपाय् यक्व आकांक्षीत दुगु व यक्व नेतातनाप सहजीकरण यानाः सरकार दयेकेमाःगु वाध्यता दुगुलिं संघीय फोरमं दुई नम्बरय् राजपा स्वयां वाम गठबन्धन नाप जानाः सरकार दयेकीगु पत्या हे याये थाकूगु अवस्था मदु । चुनाव क्वचाया अवस्था पाये धुंकूगुलिं मधेसय् न्हापा थें एमाले याकचित घेराबन्दी यायेगु अवस्थां पुलाः राजनीति मेगु हे कोर्सय् न्ह्याये धुंकल ।
चुनावय् झण्डै दुई तिहाइ मत हःपिं वामगठबन्धनया एमाले व माओवादी केन्द्रया एकताया तयारी क्वातुक्क न्ह्यानाच्वंगु मदु । वामगठबन्धन दयेका चुनावय् त्याःपिं एमाले व माओवादी केन्द्रया दथुइ एकता तापाना वन धाःसा उकिया लिच्वः पार्टीया आन्तरिक जीवनय् जक मखुकि देसय् हे राजनीतिक अस्थीरता ल्यंकीगु अवस्थाय् थ्यनी । खय्तला एकताया प्राविधिक व सैद्धान्तिक अवस्था एमाले व माओवादी केन्द्रया नितिं सहज मजूसां जनताया दथुइ प्रतिवद्धता बियाः चुनाव त्याका वये धुंकाः एकताया लँपु हिले नं अःपु मजू । हानं मतादेश थुज्वःगु कथं वःगु दुकि संघय् सरकार दयेकेत एमालेया जक ५१ प्रतिशत मत मदूगुलिं एकतायात उखेथुखे यात धाःसा माओवादी केन्द्रया नेतृत्वय् एमाले बाहेकया सरकार दयेके फइगु चुनावी लिच्वः दु । थुकथंया कुतलय् कांग्रेस दइगु अस्वभाविक नं मखु । थुज्वःगु अवस्था मवयेकेगु जिम्मेवारी एमालेया नेतृत्वया हे अप्वः धाःसां जिउ । भतिचा तुती चुलुलकि देस हानं मेगु अस्थीरताया चक्रब्यूहय् प्रवेश जुइ । थ्व अवस्थाय् माओवादीयात ब्वःबियां एमालेया नेतृत्वं थःगु जिम्मेवारी पूवंकूगु नाली मखु । एमाले व माओवादी केन्द्रया एकीकरण जुइमफुत धाःसा एमालेया नेतृत्वया सरकार न्यादँ मखु गुला झिला जक न्ह्याइ । अले कांग्रेस व भारतया खेलाडीतसें माओवादी केन्द्रया नेतृत्व् एमाले बाहेकया सरकार दयेका बिइ । थ्व क्रमय् कन्हय् वाध्य जुयाः एमालें संघीय फोरमया उपेन्द्र यादवयात प्रधानमन्त्री दयेकेमालीगु अवस्था तक थ्यनी । राजनीतिइ थौं शत्रु थें व्यवहार जूसां कन्हे मित्रु जुइत साइत स्वयाच्वने म्वाः । छपला चुलुल कि मेगु न्यादँ हानं हानथाप व अस्थीरता मवःइगु अवस्था दयेकेगु जिम्मेवारी एमाले नेतृत्वया दुई तिहाइ व माओवादी केन्द्रया एक तिहाइ दु । चुनावी लिच्वः नं थ्व निगू दलं थुकथं हे हःगु खः ।

Categorized in बिचा: