nepal life

छत्रपाति निःशुल्क चिकित्सालयया ६१ क्वःगु वार्षिकोत्सव क्वचाल

नेवा: अनलाइन न्युज – ललेन्द्र शाक्य | २०७४ माघ २४, बुधबार १२:४८:०१

बि.सं. २०१३ साल माघ २३ गतेनिसें समुदायपाखें संचालन जुयाः वयाच्वंगु येँया छत्रपाति निःशुल्क चिकित्सालयया ६१ क्वःगु वार्षिकोत्सव माघ २३ गते मंगलवाः तःजिक न्यायेकाः क्वचायेकूगु दु ।

रक्षामन्त्री भीमसेनदास प्रधानया मूपाहाँसुइ न्ह्याःगु उगु वार्षिकोत्सव ज्याझ्वः चिकित्सालयया नायः विजयबहादुर मालीया सभापतित्वय् न्ह्याःगु खः ।

उगु ज्याझ्वलय् पाहाँ कथं झायादीम्ह सभासद बसन्त मानन्धरं सुरुया अवस्थानिसें स्वास्थ्य क्षेत्रय् उगु चिकित्सालयं मद्दिक्क गरीव असहायपिन्त सेवा यानाच्वंगु ज्या अतिकं च्वछायेबहःगु पलाः धकाः धयादीगु खः ।

अथेहे नेवाः न्ह्यलुवाः लिसें संघीय समाजवादी फोरम नेपालया सहअध्यक्ष राजेन्द्र श्रेष्ठं छत्रपाति निःशुल्क चिकित्सालयं गरीव असहायपिन्त सेवा यानाः वयाच्वंगु पलाःयात च्वछासें वय्कलं २०७२ सालया भुखाय् धुंकाः चिकित्सालयं याःगु योगदानयात सुनानं गुबलें ल्वःमंके मफइगु व ल्वःमंके मज्यूगु खँ नं कनादीगु खः ।

मूपाहाँ रक्षामन्त्री भीमसेनदास प्रधानं चिकित्सालयं यानाः वयाच्वंगु सेवायात च्वछासें वय्कलं उकियात निरन्तरताया लिसें थःपिन्सं फूचाःगु ग्वाहालि यायेत सदां पलाः न्ह्याकेगु बचनबद्ध जुया प्रतिबद्धता प्वंकादीगु खः ।

उगु ज्याझ्वःया सभापति विजयबहादुर मालीं छत्रपाति निःशुल्क चिकित्सालय वडावासीया थःगु हे खः धकाः धयादिसें फुक्क छप्पं जुयाः ज्या याःसा थुकिं न्हियान्हिथं गरीबया सेवा यायां वनेफइगु खँय् बः बियादीगु खःसा वय्कलं चिकित्सालयया विकासया विषयस ध्वाथुइकादीगु खः ।

चिकित्सालयया ६१ क्वःगु वार्षिकोत्सव समारोहस चिकित्सालयस २५ दँ, २० दँ व १० दँ सेवा याादीपिं चिकित्सक लिसें कर्मचारीपिन्त हनेगु ज्या नं याःगु खः ।

उगु समाराहेस न्वकू विद्या वनमाली प्रधानं लसकुस यानादिसें आर्थिक दँ २०७३–०७४ य् चिकित्सालयं मुक्कं १ लख ९ सय म्हेसित चिकिस्ता सेवा बियागु व वमध्ये १३८० म्हेसित ७,७२,२८८।५० तका बराबरया रकमया विशेष छुट व निःशुल्क उपचार सुविधा बियागु लिसें ४५३ म्ह ल्वगिपिन्त थ्यंमथ्यं १,४९,७४३ तका बराबरया निःशुल्क वासः वितरण यानागु जानकारी बियादीगु खः ।

Categorized in स्थानिय-समाज