nepal life

चैत्र १७ निसें धनगढी प्रिमियर लिग, विजेतायात २५ लख सिरपाः

नेवा: अनलाइन न्युज | २०७४ पौष २०, बिहिबार १५:२४:२५

धनगढी प्रिमियर लिग (डिपीएल) क्रिकेट वइगु चैत्र १७ गतेनिसें जुइगु जूगु दु ।

माघ ५ गतेनिसें याइगु तयारी जूसां नं राष्ट्रिय टोली व्यस्त जुइगु जूगुलिं कासा लिछ्यायेमाःगु ग्वसाः खलः धनगढी क्रिकेट एकेदेमिं जानकारी ब्यूगु दु ।

बैशाख १ गतेतक न्ह्याइगु डिपीएल २ म्हितीपिं कासामिपिनिगु ल्यज्या अक्सनपाखें याइगु जुइ । फागुन ५ गत अक्सन जुइ । थुकिया नितिं कासामिपिन्सं पुस २० गतेनिसें माघ २५ गतेतक थःगु नां दर्ता याये क्वचायेकेमाः ।

अक्सन न्ह्यः डिपीएल म्हितीगु टिम व रणनीतिक कासामि ल्यज्या याइगु ग्वसाः खलकं जानकारी ब्यूगु दु । कप्तान ल्यज्या भाला धाःसा फ्रेन्चाइज टिमयात हे बिइगु जुइ ।

कासामिपिन्त स्वंगू पुचलय् ब्वथलीगु जुइ । कम्ती नं झिंन्यागू अन्तर्राष्ट्रिय कासा म्हितूगु व स्वदँनिसें राष्ट्रिय पुचलय् दुपिं कासामिपिं समूह ए स लाइसा ल्यंदूगु राष्ट्रिय, समूह समूह म्हितूपिं वा क्याम्पय् लाःपिं कासामि पुचः ‘बी’इ लाइ ।

समू ‘सी’इ धाःसा अनक्याप कासामिपिन्त तइगु जुइ । प्रत्येक फ्रेन्चाइज क्लबं न्युनतम रुपं समूह ‘ए’या निम्ह, ‘बी’या स्वम्ह व ‘सी’या न्याम्ह कासामि तयेमाः । हरेक टिमय् १५ म्ह कासामि दइ । गुकी निम्ह विदेशी व धनगढीइ जुइगु ट्यालेन्ट हन्टपाखें सुदूरपश्चिमया छम्ह कासामियात अनिवार्य समावेश यायेमाः ।

विजेतां २५ लख तका दां सिरपाः कथं कायेखनीसा उपविजेतां १०, स्वंगूगु थासय् लाःम्हं ३ लख व प्यंगूगु थासय् लाःम्हं  २ लख तका सिरपाः कथं कायेखनी ।

विजेताया रकम वंगु दंसिबें १० लख अप्वः खः । वंगु दँ विजेतायात १५ लख व उपविजेतायात ७ लख तका दां ब्यूगु खः ।

अथेहे म्यान अफ दि म्याचयात झिद्वः व म्यान अफ दि सिरिजयात मोटरसाइकल सिरपाः बिइ । कासाया उत्कृष्ट ब्याट्सम्यान व बलरं नं सिरपाः त्याकेखनी । ग्वसाः खलःया कथं मुक्कं सिरपाः राशि ५० लख तका तयातःगु दु ।

ग्वसाः खलकं थुगुखुसिनिसें राष्ट्रिय व अन्तर्राष्ट्रिय क्रिकेटय् सहभागी छम्ह पूर्व कासामियात धनगढी क्रिकेट सम्मान व राष्ट्रिय क्रिकेटय् महत्वं जाःगु योगदान ब्यूम्ह छम्हेसित अर्जुन खड्का स्मृति सम्मान कथं छगू छगू लख बिइगु नं धाःगु दु ।

कासाया मुक्कं लागत थ्यंमथ्यं ३ करोड जूगु धनगढी क्रिकेट एकेदेमिया नायः सुवास शाहीं धयादीगु दु ।

Categorized in कासा