nepal life

चुनाव प्रचारया लिपांगु दिं थौं, चान्हय् निसें मौन ई

नेवा: अनलाइन न्युज | २०७४ मङ्सिर १८, सोमबार ०९:३७:००

निक्वःगु चरणया प्रदेश व प्रतिनिधिसभा दुजः निर्वाचनया मौन ई थौं चान्हय् निसें न्ह्याइगु जूगु दु । निर्वाचन आयोगया प्रवक्ता नवराज ढकालया कथं मंसीर २१ गते ४५ गू जिल्लाय् जुइत्यंगु निक्वःगु चरणया चुनावया मौन ई चान्हय् १२ ता ईनिसें न्ह्याइ ।

मौन ई न्ह्यायेधुंकाः मतदान क्वमचाःतलेतक निर्वाचन प्रचार प्रसार यायेत व छुं नं माध्यमपाखें भोट फ्वने दइमखु । एसएमएस, भाइबर, फेसबुक लिसेंया छुं नं माध्यमं भोट फ्वने मदइगु निर्वाचन आयोगं जानकारी ब्यूगु दु ।

मौन इलय् चुनाव प्रचार याःसा बाय् सुनां नं भोट फ्वःगु लातधाःसा १ लख तका दां जरिवानानिसें उम्मेदवारी रद्ध याइगु तक अधिकार निवाचन आयोगयाके दु ।

लिसें मतदान केन्द्रया ३०० मिटर जःखः तयातःगु थःथःगु निर्वाचन चिं व प्रचार हलंज्वलं नं दलतसें चीकेमालीगु आयोगया प्रवक्ता ढकालं धाःगु दु ।

सोमवाः चान्हयनिसें भोट फ्वने मदइगु जूगुलिं दलत थौं सोमवाः लिपांगु दिंया चुनाव प्रचारय् व्यस्त जूगु दु । इपिं मतदातातक थ्यंकेगु नितिं लिमलाः फमलाः ब्वाँय् जूगु दु । कांग्रेस, एमाले व माओवादीया नेतात थःथःगु निर्वाचन क्षेत्रय् परिचालित जूगु दु ।

निक्वःगु चरणया निर्वाचनपाखें १२८ व प्रदेशसभाया नितिं २५६ सांसद ल्यइगु जुइ । प्रतिनिधिसभा दुजःपाखे १,६६३ व प्रदेशसभापाखे २,८१९ म्ह उम्मेदवार धेंधेंबल्लाय् दु ।

निक्वःगु चरणया निर्वाचन जुइगु ४५ गू जिल्लाय् १ करोड २२ लख ३५ हजार ९ सय ९३ मतदाता दु ।

निक्वःगु चरणया चुनाव क्वचाये खतं हे न्हापांगु चरणया चुनावया मतगणना नं नापनापं जुइ । न्हापांगु चरणया चुनाव धाःसा ३२ गू जिल्लाय् मंसीर १० गते हे क्वचायेधुंकूगु दु ।

Categorized in राजनीति