nepal life

चुनावया प्रचार प्रसार खस भासं जक याःगुलिं ध्यानाकर्षण

नेवा: अनलाइन न्युज – निश्चल | २०७४ कार्तिक २७, सोमबार १६:१४:५२

थ्वहे वइगु मंसीर १० व २१ गते निगूगु चरणय् न्ह्याकीगु प्रतिनिधिसभा व प्रदेशसभाया निर्वाचनया प्रचार प्रसार खस नेपाली भासं जक याःगुलिं निर्वाचन आयोगयात थ्व विषययात कयाः ध्यानाकर्षण याकूगु दु ।
नेवाः जागरण मञ्चया संयोजनय् सोमवाः निर्वाचन आयोगया केन्द्रीय ज्याकुथि जमलय् च्वंगु बहादुर भवनय् वनाः आयोगया प्रमुख आयुक्त अयोधीप्रसाद यादवयात भाषासेवी लक्ष्मीदास मानन्धरं थीथी भासां निर्वाचनया प्रचार प्रसार व मतदाता शिक्षाया नितिं ध्यानाकर्षणया लिसें ज्ञापन पौ लःल्हाःगु खः । ज्ञापनपत्र लःल्हायेगु ज्याझ्वलय् ३ नं. प्रदेशया थीथी पार्टीया उम्मेदवारपिं, ७ नं. क्षेत्रया उम्मेदवार नेपाली कांग्रेसया विजय माली, वाम गठबन्धनया वसन्त मानन्धर, नयाँ शक्ति पार्टीया शोभा महर्जन बज्राचार्य, अथेहे ८ नं. क्षेत्रया संघीय समाजवादीया मनरत्न शाक्य, नेकपा माओवादी क्रान्तिकारीया नमस्ते साय्मि, वाम गठबन्धनया राजेश शाक्यपिं उपस्थित जूगु खः ।
अथेहे उगु ज्याझ्वलय् नयाँ शक्तिया नेतृ हिसिला यमि, नेवाः न्ह्यलुवाः डा. महेशमान श्रेष्ठ, उमेश स्थापित, भगवान शाक्य, सुरेश मानन्धर, दीपक तुलाधर, मचाराजा महर्जन नेवाःजागरण मंचया नायः सुजीब बज्राचार्य लिसें नेपालभाषाया कार्यकर्तापिनि उपस्थिति दुगु खः ।
ज्याझ्वलय् मातृभाषां चुनाव प्रचारप्रसार यायेमाःगु खँय् सकसिनं थःथःगु नुगःखँ प्वंकूगु खः ।
प्रमुख निर्वाचन आयुक्त यादवं मातृभाषां प्रचारप्रसार यायेगु कार्यक्रम दुगु खःसां थ्व दथुइ चुनावया कार्यक्रमया तालिका उखेथुखे यायेमाःगु स्थिति ब्वलंगुलिं थ्व खँय् विचाः याना थें ज्या यायेमफुगु खँयात स्वीकार यासें निर्वाचन आयोगं मातृभाषां चुनावया प्रचारप्रसार व मतदाता शिक्षा कार्यक्रम न्ह्याकेगु जानकारी बियादिल ।
जागरण मञ्चं ब्यूगु जानकारी कथं थथे लःल्हायेत्यंगु ज्ञापनपतिइ निर्वाचन आयोग थेंजाःगु संवैधानिक निकायपाखें संविधान कथं राष्ट्रभाषा घोषित संरक्षणया निंतिं व मतदातापिंसं थःगु भासं सुचं कायेगु अधिकारयात कयाः निर्वाचन आयोग थ्व विषयस गम्भीर जुइत ध्यानाकर्षण  याकूगु दु ।

ध्यानाकर्षणया लिसें ज्ञापन पौ पूवंक ब्वनादिसँ

श्रीमान् प्रमुख आयुक्तजु
निर्वाचन आयोग
कान्तिपथ, काठमाडौं ।

थीथी भाषां निर्वाचन प्रचारप्रसार (विज्ञापन नापं) व मतदाता शिक्षाया लागि ध्यानाकर्षणया लिसें
ज्ञापनपौ ।

संघीय लोकतान्त्रिक गणतन्त्र नेपाः छगू बहुभाषिक मुलुक जूगु खँ सकस्यां सिउ व थ्व खँ संविधानय् हे नं न्ह्यथनातःगु दु । थ्व स्थितिइ राष्ट्रिय निर्वाचन व प्रादेशिक निर्वाचन थेंज्याःगु थीथी जातिभाषाया नेपाली जनताया भाग्य व भविष्यया फैसला याइगु परिघटना सम्बन्धी प्रचारप्रसार छगू जक खस नेपाली भाषां जुयाच्वनीगु पाय्छि मखु । थुकिं नेपाःया संविधान, राष्ट्र व राष्ट्रिय मूलधारप्रति थीथी जातिभाषाया जनतां अपनत्व महसुस यायेगु ह्वःताः काये खनाच्वंगु मदु । मेखे गुलिखे मतदातातय्सं बांलाक थुइक थःथःगु मांभासं माःगु जानकारी मदुगुलिं बदर मत अप्वइगु व स्वार्थप्रेरित मनू व संघसंस्थापाखें जुइगु नाजायज प्रचारपाखें समेत लिच्वः लाके फइगु खने दयाच्वंगु दु ।
नेपाःया मू मू भाषात हे लोप जुया वनीगु स्थिति जुयाच्वंगु थौंया परिस्थितिइ राज्यया अंगतपाखें व  अझ निर्वाचन आयोग थेंज्याःगु संवैधानिक निकायपाखें संविधानं हे राष्ट्रभाषा धकाः घोषणा याना तःगु मांभाय्तय्गु संरक्षणया लागिं प्रोत्साहनमूलक व प्रबद्र्धनात्मक ज्याखँत जुइमाःगु तसक हे आवश्यक खः ।
उकिं निर्वाचनया सुचं प्रचारप्रसार (विज्ञापन नापं) व मतदाता शिक्षाय् नेपालभाषा, तामाङ भाषा लगायतया भाषात नं छ्यलेत माग यासें ध्यानाकर्षणया लिसें थ्व ज्ञापनपौ लःल्हानाच्वना 

नेवाः जागरण मंच

Categorized in राष्ट्रिय