nepal life

चुनावया दिं नगरबासीं हे फोहोर व्यवस्थापन यायेत येँमनपाया इनाप

नेवा: अनलाइन न्युज | २०७४ मङ्सिर २०, बुधबार १४:५५:२६

येँ महानगरपालिकां मंसीर २१ गते बिहिवाः जुइगु प्रतिनिधि व प्रदेशसभाया निर्वाचनया दिं सकल महानगरवासीपिन्त छेँपाखें पिहाँ वइगु फोहोर थःपिन्सं हे व्यवस्थापन यायेत आग्रह याःगु दु ।

निर्वाचनय् सार्वजनिक यातायातया साधन संचालनय् रोक तःगु व कर्मचारीपिन्सं नं थःगु मताधिकार छ्यलाबुला यायेदयेमाःगु व्यवहारिक पक्षयात ध्यानय् तयाः उगु निर्णय याःगु येँ महानगरपालिकाया सह–प्रवक्ता नवराज ढकालं जानकारी बियादीगु दु ।

फोहोर कुबिइगु गाडी संचालनया नितिं अनुमति दुसां नं तापाक्क च्वंपिं कर्मचारी वयेगु नितिं समस्या जुइगु जूगुलिं नियमितथें फोहोर मुुंकेगु ज्या याये मफइगु येँ महानगरपालिकां जानकारी ब्यूगु दु । छुं कर्मचारीपिन्त वयेत सहज जूसां नं फुक्क कर्मचारी वयेमफइगु जूगुलिं फुक्क थासय् च्वंगु फोहोर मुंके मफइगु जानकारी ब्यूगु दु ।

नगरवासीं लाक्वपाक्व फोहोर वांछ्वइबलय् मतदातापिन्त तकं समस्या जुइगु जूगुलिं चुनावया दिं फोहोर व्यवस्थापन यायेत येँ महानगरपालिकां आग्रह याःगु दु ।

न्हिथं येँ महानगरपालिकापाखें ५०० टन फोहोर मुंकेगु ज्या जुयाच्वंगु दु । चुनावया दिं पिहाँ वइगु फुक्क फोहोर व्यवस्थापनया नितिं येँ महानगरपालिकां शुक्रवाः मंसीर २२ गते हे कर्मचारी खटेयायेगु नं वातावरण व्यवस्थापन विभागया प्रमुख हरि कुँवरं जानकारी बियादीगु दु ।

Categorized in राष्ट्रिय