nepal life

चीनय् ‘नेपाःया न्हायकं’

नेवा: अनलाइन न्युज | २०७४ मङ्सिर १४, बिहिबार १३:२३:१९

चीनया च्याङसु प्रान्तया छाङचौं महानगरय् कलाकार लिउ फिङ छिउं नेपाः सम्बन्धय् कियातःगु किपाःया ब्वज्या याःगु दु ।

नेपाः भ्रमण यानाः लिहाँ वनेधुंकाः प्यदँ बिकाः लिउ नं थःम्हं कियागु ९० पाः चित्रकला दुथ्याकाः लिउ हाइ सु ग्यालरीइ ‘मिरर अफ नेपाल’(नेपाःया न्हायकं) शीर्षकय् याकः चित्रकलाया ब्वज्या बुधवाः क्वचायेकूगु खः ।

चिनियाँ कम्युनिष्ट पार्टी छाङचौं महानगर समिति, संस्कृति, संचार व प्रकाशन ज्याकुथि व च्याङसु कलाकार संघं ग्वसाः ग्वःगु उगु ब्वज्या न्यान्हुतक न्ह्याःगु खः । चित्रकला ब्वज्याया नितिं छाङचौं कलाकार संघ व अन्तर्राष्ट्रिय मित्रताया नितिं चिनियाँ जनसंघ छाङचौं लिसेंया संघसंस्थां ग्वाहालि याःगु खः ।

सन् २०१३ स नेपाः भ्रमण यानादीम्ह लिउ नं चिनियाँ मसी, कुची व भ्वँ पाखें नेपाःया रहनसहन, प्राकृतिक सौन्दर्य, सांस्कृतिक विविधता लिसेंया विषययात थःम्ह किपातय् ब्वयागु खँ कनादीगु दु ।

चीनया नितिं नेपाली राजदूत लीलामणि पौड्यालं छगू हसना (सन्देश) छ्वयाः कलाकार लिउया कलाय् नेपाःया संस्कृति, प्राकृतिक सौन्दर्य व विविध जनताया चित्रण यानातःगु न्ह्यथनादीगु दु ।

चिनियाँ कलाकार संघ लिसेंया आपालं संघसंस्थाय् आबद्ध ६८ दँया लिउया किपातं आपालं राष्ट्रियस्तरया सिरपाःत त्याकेधुंकूगु दु । वय्कःया चित्रकला चीनया राष्ट्रिय कला संग्रहालय, चिनियाँ केन्द्रीय ललितकला प्रतिष्ठान लिसेंया संस्थाय् संग्रह यानातःगु दु ।

चित्रकला ब्वज्याया नितिं अमेरिका, जापान, स्पेन, दक्षिण कोरिया, सिंगापुर, मलेसिया लिसेंया देस थ्यंकूगु वय्कःया मेमेगु किपाःत विदेशय् नं संग्रह यानातःगु धाःगु दु ।

Categorized in अन्तर्राष्ट्रिय