nepal life

चीनयात नेपालं ५० रनं बुकल

नेवा: अनलाइन न्युज | २०७४ मङ्सिर १०, आइतबार १३:१६:३५

आईसीसी मिसा टि–२० विश्वकप क्रिकेट अन्तर्गत एसिया क्षेत्रया छनोटया लिपांगु कासाय् नेपालं त्याकूगु दु । आइतवाः जूगु कासाय् नेपालं चीनयात ५० रनं बुकूगु खः ।

बैंककय् च्वंगु एसियन इन्स्टिच्युट अफ टेक्नोलोजी कासा ख्यलय् नेपालं ब्यूगु १०३ रनया लक्ष्य ज्वनाः ब्याटिङ याःगु चीन १८ ओभरय् २ बलय् अलआउट जुयाः ५२ रनय् कःघाःगु खः । नेपाःया बल्लाःगु बलिङय् चीनया सुं नं कासामि क्रिजय् टेके जुइमफुत ।

कासाय् कमजोर कथं काःगु चीनं सुरुवातनिसें हे खराब ब्याटिङ याःगु खः । चीनं १० ओभरया समाप्तिइ ६ विकेट गुमेयानाः जक २५ रन दयेकूगु खः । चीनया नितिं हान लिलिं १५, कोयायुन झौ नं १० व जाङ याङलिङं ९ रन दयेकूसां नं मेपिं कासामिपिन्सं बांलाक्क म्हिते मफुत । चीनयात अःपुक हे कःघायेत वुमन अफ दि म्याच जूम्ह सबनम राई व कप्तान रुविना क्षेत्रीं समान ३–३ विकेट काःगु खः । अथेहे, सीता राना मगरं २ व करुणा भण्डारीं १ विकेट काःगु खः ।

थ्वसिबें न्ह्यः टस बुकाः न्हापां ब्याटिङया पाः काःम्ह नेपालं मुक्कं २० ओभर म्हिताः ८ विकेट गुमेयानाः १०२ रन दयेकूगु खः । चीनविरुद्ध नेपालं खराब सुरुवात याःगु खः । नेपालं जक २० रन मुंकूबलय् निगू ओपनर सीता रानामगर व ज्योति पाण्डेयात गुमेयाःगु खः । सीता ४ रनय् आउट जूगु खःसा ज्योतिं ९ रन मुंकूगु खः । तर, दकले लिपा ब्याटिङ याःवःम्ह नेपाःया कप्तान रुविना क्षेत्रीं अविजित १८ व मध्यक्रमया ब्याट्सवुमन काजल श्रेष्ठं १६ व नेरी थापां ११ रन दयेकेधुंकाः नेपाःया सम्मानजनक स्कोर मुंगु खः ।

अथेहे, नेपाःया सरीता मगरं ८, इन्दु वर्मा व रिता कुमारी कनुजियां समान ६–६ रन मुंकूबलय् रोमा थापा ३ रनय् पेभेलियन लिहाँ वंगु खः । करुणा भण्डारी २ रनय् अविजित जूगु खः ।

चीनया झाङ सियानसीं ३ व लि होई, मिंग्यु झू व हान लिलीं समान १–१ विकेट काःगु खः ।

लिपांगु कासाय् चीनयात बुकुंसां नं नेपाल नेदरल्याण्डय् जुइगु विश्वकप छनोटया ग्लोबल छनोटय् थ्यंके मफुत । आः नेपालं स्वंगूगु थाय्यानितिं सोमवाः थाइल्याण्ड व हंगकंगमध्ये छगू पुचःलिसे म्हिती ।

ग्लोबल छनोटय् थ्यंकेत नेपाःयात छनोटया शीर्ष निगुलि थ्यंकेमाःगु आवश्यकता दु । तर, छनोटय् नेपाः ६ ल्याः मुंकाः स्वंगूगु थासय् जक थहाँ वयेफूगु खः ।

आइतवाः हे जूगु कासाय् युएई नं मलेसियायात बुकेधुंकाः नेपाःया शीष निगुलि थ्यंकेगु आज्जु क्वचाःगु खः । नेपालं कासाया निगू कासाय् त्याकुगु व छगू कासा बूगुलिं निगू कासाय् ल्याः इनेमाःगु खः ।

नेपालं न्हापांगु कासाय् ग्वसाः खलः थाइल्याण्ड व निगूगु कासाय् हंगकंगलिसे १–१ ल्याः इनेमाःगु खः । स्वंगूगु कासाय् युएईलिसे ५ रनं पराजित जुइधुंकाः नेपाःया शीर्ष निगुलि थ्यनेगु सम्भावना कमजोर जूगु खः । नेपालं शुक्रवाः मलेसियायात ३३ रनं बुकुसें न्हापांगु जित ताःलाकूगु खः ।

छनोटय् युएई नं ८ ल्याः मुंकाः ग्लोबल छनोटय् थाय् दयेकूगु खः । आः आयोजक थाइल्याण्ड व हंगकंग दथुया कासा लिपा ग्लोबल छनोटय् थ्यनीगु मेगु पुचःया नां घोषणा जुइ ।

ग्लोबल छनोटया शीर्ष निगू पुचलं वइगु दँ वेष्ट इन्डिजय् ग्वसाः ग्वइगु मिसा टि–२० विश्वकपय् थाय् कायेत ताःलाइगु जूगु दु ।

छनोटय् थाइल्याण्ड ७ ल्याःलिसें निगू थासय् दुसा हंगकंग ५ गू ल्याः लिसें प्यंगूगु थासय् दु । छनोटय् २ ल्याः मंकूम्ह मलेसिया न्यागूगु थासय् दुसा फुक्क कासा गुमेयाःम्ह चीन लिपांगु थासय् लाःगु दु ।

Categorized in कासा