nepal life

चन्द्रविनायक व भैरवनाथ जात्रा न्ह्यात

नेवा: अनलाइन न्युज | २०७४ कार्तिक १९, आइतबार १४:४५:४२

थ्यंमथ्यं स्वसः व न्यय्दँ पुलांगु चन्द्रविनायक व भैरवनाथ जात्रा शनिवाःनिसें येँया चाःबहीलय् न्ह्याःगु दु ।

दँय् दसं कातिक शुक्ल पुन्हीनिसें मंसीर शीर्षकृष्ण तृतीयातक प्यन्हुयंकं पशुपति, जयबागेश्वरी, मित्रपार्क, चाःबही व चुच्चेपाटी क्षेत्रय् चन्द्रविनायक जात्रा न्यायेकाः वयाच्वंगु दु । नेपाल संवत् ८०१ स जुजु भूपालेन्द्र मल्लं उगु जात्राया शुरुवात याकूगु जनविश्वास दु ।

‘मलःजा नकेगु’ धाइग्ु जात्राया न्हापांगु दिं कुमार व कुमारीया पूजा यानाः विनायकया प्रसाद नकेगु याइ । स्वनिगःया प्यम्ह विनायकमध्ये छम्ह चन्द्रविनायकयात पशुपतिनाथया काय् कथं कयातःगु दु ।

पशुपतिनाथ अमालकोट कचरहीया द्वारें शनिवाः सुथय् चन्द्रविनायक देगलय् विशेष पूजा यायेधुंकाः जात्रा न्ह्याइगु खः । पुन्हीया दिं बहनी देगः जःखः धुनी जगेयात । धुनी जगे यायेत पशुपतिनाथ अमालकोट कचहरीं सिँ उपलब्ध याकाः वयाच्वंगु खः ।

मार्ग शीर्षकृष्ण पारुया दिं सुथय् अर्थात् थौं आइतवाः सुथय् चन्द्रविनायक व भैरवनाथया खः ल्ह्वंगु जात्रा समन्वय समितिया नायः पूर्ण संगतं जानकारी बियादीगु दु । वय्कलं धयादी, “जात्राया निन्हुया दिं थौ. आइतवाः गणेद्यःयात हलमलि अर्थात् कःनि, छुस्या, मुस्या, चाकुहि, सकि, लड्डु, प्यारा व लावा छायेगु याइ । थथे छाःगु हलंज्वलं प्रसादया रुपं बहनी जात्रा स्वःवःपिन्स व जात्रालिस सम्बन्धित मनूतय्त इनाः नकेगु याइ ।”

अथेहे थौं आइतवाः चन्द्रविनायक व भैरवनाथया खःयात देगः जःखः चाःहीकाः गंगाहितिइ यंकाः म्वः ल्हुइकेगु चलन दु । म्वः ल्हुइके धुंकाः निगुलिं खःयात थौ. आइतवाः बहनी चारुमति विहारय् यंकाः दिकियंकी ।

मार्ग शीर्षकृष्ण द्वितीया अर्थात् कन्हय् सोमवाः निगुलिं रथयात पशुपतिइ यंकाः अबुया दर्शन याकाः अनंनिसें चुच्चेपाटीतकया मू चुकय् चाःहीकेगु चलन दूगु जात्रा समितिया दांभरी जितेन्द्र श्रेष्ठं धयादिल । बहनी धाःसा चारुमति बिहारय् हे रथ प्याखं ल्हुइकाः तसि प्रसादया रुपं इनेगु याइ ।

मार्ग शीर्षकृष्ण तृतीयाया दिं सुथय् अमालकोट कचरीया द्वारें चन्द्रविनायक व भैरवनाथयात अबिर छायेधुंकाः जात्रा क्वचाइ । जात्रा तःजिक क्वचायेधुंकाः लसतां मंगलवाः न्हिच्छि चाःबही क्षेत्रय् सिन्हःयाः(सिन्दुर जात्रा) न्यायेकी ।

उगु जात्राया लसताय् कलाकार हरिप्रसाद शर्माया प्राचीन व मध्यकालीन उपत्यकाया झाँकी दुथ्याःगु चित्रकला नं शनिवाःनिसें प्रदर्शनय् तयातःगु दु । प्रदर्शनी जात्राज्वःछि अर्थात् मंगलवाःतक न्ह्याइ ।

Categorized in स्थानिय-समाज