nepal life

ग्रहमन्त्रालयपाखें आः तप्यंक हे गोली क्ययेकेगु आदेश

नेवा: अनलाइन न्युज – ललेन्द्र शाक्य | २०७४ मङ्सिर ३, आइतबार १४:०२:१५

गृहमन्त्रालयं बम विस्फोटया घटनाय् दुथ्याःपिंविरुद्ध कडा रुपं न्ह्यःने वनेत सशस्त्र व नेपाल प्रहरीयात निर्देशन ब्यूगु दु ।

गृहमन्त्रालय स्रोतं धाःगु दु, ‘बम विस्फोटय् दुथ्याःपिन्त गन नापलात अन हे ज्वनेत व विस्फोट यानाच्वंगु बाय् विस्फोटक पदार्थ ज्वनाः वयाच्वंगु लुल धाःसा तप्यंक हे गोली क्ययेकेगु तकं आदेश बियागु दु ।’ तर, गृहमन्त्रालयया विज्ञप्तिइ धाःसा गोली क्ययेकेगु आदेश न्ह्यथनातःगु मदु ।

रौतहतया चन्द्रनिगाहपुरय् वामगठबन्धनं याःगु चुनावी सभाय् अज्ञात पुचलं याःगु बम विस्फोटपाखें छम्ह मचालिसें खुम्ह घाःपाः जूगु दु । सरकारी अस्पताललिक्क च्वंगु राधाकृष्ण देगलय् जुइत्यंगु एमाले व माओवादी केन्द्रया मंकाः सभायात लक्षित यानाः बम विस्फोट याःगु खः ।

विस्फोटय् लानाः च्यापसः चलेयाइम्ह ३१ दँया सरिता राई व वया ७ दँ दुम्ह काय् जैविक राई तच्वकं घाःपाः जूगु खः । सरिताया तुतिइ बमया छर्रा लाःगु खः । काय्म्ह जैविकया म्हगःया थीथी थासय् तच्वकं घाःपाः लाःगु खः । इमित वासः यायेगु नितिं वीरगञ्ज यंकूगु खः ।

घाःपाः जूपिं मेपिं चन्द्रपुर नगरपालिकाया ४५ दँया लक्ष्मी राई, ५५ दँया रामबहादुर बिक, ४८ दँया कुन्ता खत्री, ३९ दँया गोपाल विक, ४५ दँया दिलमाया राई व ५० दँया यमुना काफ्ले खः । एमाले कार्यकर्ता काफ्लेया छपाल्हाःया पतिं हे त्वःधूगु दु ।

बम विस्फोट सुनां याःगु खः धैगु सीमदुनि । घटनाया छुं संगठनं जिम्मा काःगु मदुनि । बाम गठबन्धनया स्थानीय नेता उद्धव रेग्मीं भेला जुइगु छुं ई न्ह्यः विस्फोट जूगु जानकारी ब्यूगु खः ।

निर्वाचन लिक्क वयाच्वंगु इलय् छाय् थथे आक्रमण जुल ? थ्व विषयस छानबिन जुइमाः । थुकिया ल्यूनेया आज्जु छु खः ? निर्वाचन लिक्क वयाच्वंगु इलय् थुज्वःगु घटना झन् अप्वयाः वयाच्वंगु दु । तर, सुरक्षा निकाय अनुसन्धान यायेगु मामिलाय् कमजोर खनेदूगु दु । थुज्वःगु घटना जुयाच्वंगु दु धैगु न्हापा हे सीकेमाःगु खः । घटना जुइखतं अनुसन्धान जूगु जूसा गिरफ्तार यायेफइगु अवस्था वइगु खः धकाः कांग्रेस बरिष्ठ नेता रामचन्द्र पौडेलं धयादीगु दु ।

(थौं ने.सं. ११३८ मंसीर ३ गते आइतवाः नयाँ पत्रिका न्हिपती पिदंगु बुखँ)

Categorized in पत्रपत्रिका