nepal life

गौरीशंकर धुँजुं दयेकूगु “शेरबहादुर’ राजनीतिया बाखं मखु

नेवा: अनलाइन न्युज – विजयरत्न | २०७४ कार्तिक २९, बुधबार १०:४९:३१

नेपाःया संकिपा ख्यःया नांजाःम्ह सिनेमाटोग्राफर गौरीशंकर धुँजु श्रेष्ठ नं आः संकिपा निर्माणया ज्याय् थःगु पलाः न्ह्याकादीगु दु ।

थ्यंमथ्यं स्वीदँति न्ह्यवःनिसें संकिपाया ख्यलय् सिनेमाटोग्राफीया ख्यलय् पलाः न्ह्याकाः वयाच्वनादीम्ह गौरीशंकर धुँजुं आः वया “शेरबहादुर’ नांयागु खस नेपाली भाय्या संकिपाया निर्माण ज्याः न्ह्याकूगु दु ।

धिराज प्रोडक्शनया ब्यानरय् दयेकूगु थ्व संकिपाया निर्माता गौरीशंकर धुँजु व धिराज राजवंशी खःसा थ्व संकिपायात आर. राजवंशीं निर्देशन यानादीगु खः । थ्वसिबें न्ह्यः कान्तिपुर टेलिभिजनय् पिदंगु झरना बज्राचार्यया मेन रोल दूगु “अग्नीकुण्ड’ नांयागु तसकं बय् बय् जूगु टेलिसिरियल दयेकेधुंकूम्ह आर. राजवंशीया थ्व न्हापांगु संकिपा खः ।

“शेरबहादुर’ संकिपाय् नांजाःम्ह कलाकार सुनिल थापां रिटार्यड आर्मी शेरबहादुर जुयाः म्हिताच्वंगु दुसा थगु संकिपाय् कर्मा शाक्य, मेनुका प्रधान व रविन्द्र झाया नं मेन रोल दु ।

मंगलवाः छगू ज्याझ्वःया दथुइ “शेरबहादुर’ संकिपाया म्ये रिलिज याःगु दु । “कान्छी मट्याङ ट्याङ’ बोलया थ्व म्ये थौंकन्ह्य् लोकंह्वानाच्वंगु आइटम म्येया स्टाइलय् दयेकातःगु दुसाः थ्व म्येयात नांजाःम्ह नृत्य निर्देशक बसन्त श्रेष्ठं कोरियोग्राफी यानादीगु दु ।

थुगु म्येय् कोशिस क्षेत्री व मीना निरौलां सः बियातःगु दु । थ्व म्येया संगीतकार नं कोशिस क्षेत्री हे खःसा च्वमि नं वय्क स्वयं खः ।

छम्ह अभिनेताया रुपय् “मोक्ष’ संकिपाय् छम्ह शारिरीक रुपं अशक्तम्ह संगीतकःमिया भूमिकाय् सशक्त अभिनय यानाः नुगः त्याकूम्ह खः । थ्व संकिपाया क्यामेरापर्सन दीर्घ गुरुङ्ग खःसा डाइरेक्टर अफ फोटोग्राफर गौरीशंकर धुँजुं यानादीगु खः ।

म्ये रिलिज ज्याझ्वलय् नुगःखँ तयेगु झ्वलय् मेन रोल म्हिताच्वंम्ह सुनिल थापां थःयात नेपालय् आपासिनं “चिनो’या रात्ते कांइला व भारतय् “मेरीकोम’य् प्रियंका चोपडाया बक्सिङ कोचया रुपय् म्हसीका वयाच्वंगु खःसा “शेरबहादुर’ पिहाँ वयेधुंका थःयात सकसिनं शेरबहादुरया रुपं म्हसीकी धकाः धयादिलसा निर्माता गौरीशंकर धुँजुं थ्व संकिपाया नां देशया वर्तमान प्रधानमन्त्रीया नांलिसे ज्वःलासां थ्व वय्कलिसे स्वापू दूगु वा राजनीतिलिसे स्वापू दूगु संकिपा मखु धकाः स्पष्ट यानादिल ।

थ्वहे वइगु माघ १९ गते देय् न्यंकं रिलिज जुइगु थ्व फिल्मया मंगलवाः रिलिज जूगु म्ये लोकंह्वाना वःगुलिं “शेरबहादुर’ पुचलं लसता नं प्वंकूगु खः ।

Categorized in कला