nepal life

गोली कःम्ह मिसां मचा बुइकल, स्वम्ह लडाकू व निम्ह भारतीय सेना सित

नेवा: अनलाइन न्युज | २०७४ माघ २८, आइतबार १६:०७:२९

भारत स्वशासित क्षेत्र काश्मिरय् गोली कयाः घाःपाः जूम्ह छम्ह मिसां घाःपाः जुयाच्वंगु अवस्थाय् हे छम्ह मचाया बुइकूगु दु ।

बन्दुकधारीपिन्सं गोली क्ययेके धुंकाः सैनिक अस्पतालय् भर्ना जूम्ह उम्ह घाःपाः जूम्ह मिसां शनिवाः अस्पतालय् हे मचा बुइकूगु भारतया सैनिक स्रोतं जानकारी ब्यूगु दु ।

पाराम्जीत कउर नां याम्ह उम्ह मिसा व वया मचाया अवस्था आः सुधार जूगु अधिकारीपिन्सं जानकारी ब्यूगु दु ।

प्वाथय् दुम्ह उम्ह मिसायात ल्यूनेया क्वय् च्वंगु भागय् गोली कःगु खः । घाःपाः जुइधुंकाः उम्ह मिसायात सेनाया हेलिकोप्टरपाखें वासः यायेगु नितिं अस्पताल यंकूगु खः ।

सञ्जुवान सैन्य ज्याकुथिइ भारतीय सुरक्षाकःमि व लडाकू दथुइ ल्वापु जुयाः उम्ह प्वाथय् दुम्ह मिसायात गोली कःगु खः ।

उम्ह मिसायात अस्पतालय् तत्काल भर्ना यानाः मचा बुइकेगु नितिं माःगु वासःत ब्यूग खः ।

मचा बुइधुंकाः जक उम्ह मिसाया घाःया वासः याःगु अस्पताल स्रोतं जानकारी ब्यूगु खः ।

उगु घटनाय् लानाः स्वम्ह लडाकू व निम्ह भारतीय सुरक्षाकःमिपिं स्याःगु भारतीय सैन्य स्रोतं जानकारी ब्यूगु दु ।

एके ५६ राइफललिसें थीथी विस्फोटक पदार्थ व ल्वाभःत सरकारी सुरक्षाकःमिपिन्सं नियन्त्रणय् काःगु दु ।

Categorized in अन्तर्राष्ट्रिय