nepal life

गोपाल खड्कायात कारवाही यायेत मन्त्रिपरिषदय् प्रस्ताव यंकीगु

नेवा: अनलाइन न्युज | २०७४ भाद्र २७, मंगलबार १८:०७:१०

आपूर्ति मन्त्री शिवकुमार मण्डल पेट्रोलियम पदार्थ भण्डारणया नितिं जग्गा खरिद याःबलय् अनियमितता याःगु ठहर यासें नेपाल आयल निगमया कार्यकारी निर्देशक गोपालबहादुर खड्कायात कारवाहीया नितिं मन्त्रिपरिषदय् प्रस्ताव यंकेगु तयारी जूगु खुलासा याःगु दु ।

आपूर्ति मन्त्री मण्डलं मन्त्रालयया छानविनं जग्गा खरिद याःबलय् अनियमितता जूगु क्यंगु दु । वं छानविनया झ्वलय् खनेदूगु तथ्यत लिसेंया प्रतिवेदन तयार यानाः सोमवाः प्रधानमन्त्री ज्याकुथिइ छ्वयेधुंकूगु जानकारी बियादिल ।

वय्कलं धयादी, “जग्गा खरिदया झ्वलय् खनेदूगु विषयस न्यनागु न्ह्यसःया लिसःलिसेंया प्रतिवेदन प्रधानमन्त्री ज्याकुथि छ्वयेधुनागु दु ।” प्रतिवेदनय् खनेदूगु तथ्यया आधारय् दोषीयात कारवाही यायेगु वय्कलं धयादिल ।

मन्त्रालयं याःगु छानविनया आधारय् कारवाहीया नितिं उकिया प्रस्ताव वइगु मन्त्रिपरिषदया बैठकय् यंकेगु तयारी जूगु मन्त्री मण्डलं धयादीगु दु । वय्कलं निगम नेतृत्वयात कारवाही यायेत मन्त्रिपरिषदय् प्रस्ताव यंकेगु तयारी याःगु संकेत यानादिल ।

वय्कलं धयादी, “वइगु मन्त्रिपरिषद बैठकं आयल निगमया सम्बन्धय् ठोस निर्णय याइ ।”

निगमया जग्गा खरिद अनियमितताय् ग्वाहालि मयाःगुलिं न्हापांम्ह आपूति सचिव प्रेमकुमार राईया सरुवा याःगु वय्कलं धयादिल ।

दोषी खनेदुपिं सुनानं उन्मुक्ति कायेमखनीगु वय्कलं प्रष्ट यानादिल । संसदीय समितितसें ब्यूगु प्रतिवेदनयात नं मन्त्रालयं गम्भीर रुपं स्वयाच्वंगु वय्कलं धयादिल ।

सोमवाः जक संसदया उद्योग वाणिज्य व उपभोक्ता हित सम्बन्ध समितिं निगमया जग्गा खरिदय् घोटाला जूगु धासें उकी दुथ्याःपिं मन्त्रालयया तत्कालीन मन्त्री, संचालक समिति व निगम अधिकारीपिन्त कारवाही यायेत सरकारयात निर्देशन ब्यूगु दु ।

Categorized in राजनीति