nepal life

गुज्वःगु थाय् थ्व ? गन चा च्वनिपिं सुं हे लिहां वइमखु !

२०७४ आषाढ १९, सोमबार १३:११:५०

भारतया राजधानी दिल्लीपाखें ३०० किलोमिर तापाक्क च्वंगु राजस्थानया अबलरय् छगू पुलांगु किल्ला दु । थ्व किल्ला आः भग्नावशेषया रुपय् लानाच्वंगु दु । थ्व खण्डहर छुं इलय् धाःसा छगू भव्य व मनूतसें जाःगु क्षेत्र खः ।

थ्व इलाकाय् सोमेश्वर, हनुमान, कृष्ण, देवी आदिया दर्जनौं देगःत दु । भगवानै भगवानया दथुइ च्वंगु थ्व थाय् धाःसा भुताहा थाय्या नामं नांजाः । थ्व थासय् छुं नं भवनय् पलि धाःसा मदु । तर अजूचायापूगु खँ छु धाःसा फुक्क देगः चुस्त अवस्थाय् दु ।

थ्व थाय्यात श्राप लाःगुलिं भुताहा थाय् धैगुलि विश्वास यानातःगु दु । थुगु थासय् महल दूगु थासय् मिसाम्ह गुरु बालुनाथ च्वनीगु खः । वं उगु महल दयेकूगु इलय् थःगु ध्यान भंग याइगु जूगुलिं अन छुं नं महल मदयेकेत ख्याच्वः ब्यूगु खः ।

यदि थःगु ध्यान भंग याःसा फुक्क सहर ध्वस्त जुइगु ख्याच्वः वं ब्यूगु खः । तर वयागु खँयात सुनानं ध्यान मबिल व अन भवनत दयेकल । गुकिया हुनिं गुरुं श्राप बिल व चांचां उगु थाय् मशानघाटथें जुल ।

उगु थाय्यात छम्ह तान्त्रिकं नं श्राप ब्यूगु हुनिं थःथवय् ध्वस्त जुयाः खण्डहरय् हिउगु विश्वास यानातःगु दु ।

उम्ह तान्त्रिकं उगु किल्लाय् वइपिं सुं नं मनूतसें पुनर्जन्म काये मखनेमा धैगु श्राप ब्यूगु खः । वहे हुनिं उगु क्षेत्रय् अकालय् ज्यान वंपिं मनूतय्गु आत्मां मुक्ति कायेमखन व पुनर्जन्म तकं कायेमखंबलय् आपालं मृतात्मात आः नं भड्के जुयाच्वंगु विश्वास यानातःगु दु ।

उगु थासय् सनिल जुइखतं मनूत वनेत ग्याइगु खः । सरकारी अधिकारीं नं अन बहनिया इलय् वनेत निषेध यानातःगु दु । उगु थासय् चा च्वनिपिं मनूत सुं नं म्वाःम्ह जुया लिहां वनीमखूगु स्थानीय बासिन्दां धाःगु दु । म्वाःम्ह जुयाः लिहां वःपिं मनूत नं मानसिक रुपं विक्षिप्त जूगु खँ धाःगु दु ।