nepal life

गालय् ल्हाकल मचायात ः अय्सां म्वात !

२०७४ श्रावण १४, शनिबार ०९:१५:०९

ल्हाकाःतःम्ह ह्याउँमचा ख्वयाहयेधुंकाः उद्धार

घटना भारतया खः, भारतीय राज्य मध्येप्रदेसय् न्हय्न्हु दुम्ह छम्ह ह्याउँमचायात वया मांम्हं म्वाःम्वाः हे जमिन तःले गाः म्हुयाः ल्हाकेधुंकाः उम्ह ह्याउँमचा ख्वःगु गांया मनूतसें तायेधुंकाः उम्ह ह्याउँमचा म्वाःम्वाः हे गाःपाखें लिकाःगु खः ।

गालय् ल्हाकाः वंगु कैयौं घण्टा लिपा नं उम्ह मचा म्वायेत ताःलाःगु थुगु घटनायात थुगु इलय् भारतय् अजूचायापूगु घटनाया रुपं काःगु दु । छम्ह १६ दँया मिसा बलात्कृत जुयाः बूम्ह उम्ह मचायात समाजय् लाजया ग्याःचिकुं गालय् ल्हाकाः त्वःताः वंगु खः मांम्हं ।

ब्याहा मजूनिम्ह उम्ह मिसां मध्यप्रदेशया बरवानीपुरय् च्वंगु वया अबुया छेँय् काय् बुइकूगु खः । मचा बूगु छवाः लिपा छेँसिबें भच्चा तापाक्कया ख्यलय् उम्ह मचायात ल्हाकाःतःगु अवस्थाय् गांया मनूतसें लुइकूगु खः ।

मचाया मांम्हं उम्ह मचायात लँपु लिक्कया ख्यलय् ल्हाकूगु व वहे लँपु जुयाः गांया मिसापिं वये–वने यानाच्वंगु अवस्थाय् मचा ख्वयाहःगु सः तायेधुंकाः चा लिकया उगु गालय् म्हुयाः स्वःबलय् ल्हाकाःतःगु अवस्थाय् मचा ख्वयाच्वंगु लुइकूगु व उम्ह मचायात म्वाःम्वाः उद्धार याःगु खः ।

वधुंकाः उम्ह मचायात बरवानी जिल्लाया अस्पताल भर्ना याःगु खः । मचाया स्वास्थ्य अवस्था आः बांलाः जूगु अस्पताल सुत्रं जानकारी ब्यूगु दु । अस्पतालं पिथंगु विज्ञप्तिइ धयातःगु दु, ‘म्हगःन्यंकं पतिं व कीचां न्यानातःगु दाग दु व चां यानाः म्हगः फुक्क ह्याउँसे च्वंगु दु, जिमिसं वासः यायेगुलिं छुं नं म्हो यानागु मदु व आः मचाया स्वास्थ्य बांलानावःगु दु ।’

वंगु वाः जूगु उगु घटनाया जानकारी प्रहरीं शुक्रवाः जक सार्वजनिक याःगु खः । प्रहरीं उम्ह मिसाया नां धाःसा सार्वजनिक याःगु मदु । उम्ह मिसायात प्रहरीं नियन्त्रणय् कयाः अनुसन्धान न्ह्याकूगु दु। अनुसन्धानया झ्वलय् प्रहरी न्ह्यःने उम्ह मिसां थः गांया १७ दँया मिजंपाखें बलात्कृत जुयाः थःम्हं उम्ह मचा बुइकाःगु स्वीकार याःगु खँ धाःगु दु ।

प्रहरीं बलात्कार याःम्ह मिजंयात नं मात्तुमाला नियन्त्रणय् काःगु जानकारी वःगु दु । उम्ह मिजं नं थःम्हं उम्ह मिसालिसे ब्याहा यायेत स्वीकार याःसां नं मचा धाःसा स्वीकार मयाःगु खँ नं प्रहरीं जानकारी ब्यूगु दु ।
उम्ह मिसाया मांअबुं नं उम्ह मिजंयात ब्याहा यायेत दबाब ब्यूगु तर वं थःम्हं मचा स्वीकार मयायेगु धाःगु जानकारी मिसाया अबुं प्रहरीं न्ह्यःने ब्यूगु दु ।

भारतय् १८ दँसिबें म्हो उमेरय् याइगु यौनस्वापूयात बलात्कारया रुपं काइगु कानूनी प्रावधान दु । भारतया गांगामय् बलात्कारया घटना आपालं अप्वयाः वयाच्वंगु दु ।

भारतया सरकारी तथ्यांकय् सन् २०१५ स जक थ्यंमथ्यं २०,००० बलात्कारया घटना प्रहरीइ दर्ता जूगु दु । बलात्कारथें जाःगु ज्यायात निरुत्साहित यायेत भारतय् कडा कानूनी व्यवस्थ यानातःगु जूसां नं थुज्वःगु बलात्कारया घटना म्हो जुइफयाच्वंगु मदु ।