nepal life

गाडी न्यायेगु खः ला ? थौंनिसें बिल बैंकं आपालं प्रतिशतय् कर्जा

नेवा: अनलाइन न्युज | २०७४ श्रावण ३२, बुधबार १३:४५:२३

नेपाल राष्ट्र बैंकं मंगलवाः एकिकृत निर्देशन जारी यासें सवारी कर्जाया धितो मूल्यांकनयात ५० प्रतिशतपाखें अप्वयेकाः ६५ प्रतिशत थ्यंकूगु दु ।

राष्ट्र बैंकं चालू आर्थिक दँया मौद्रिक नीतिपाखें सवारी कर्जायात छुं लचकता हयेगु नीति काःगु खः । वहे कथं राष्ट्र बैंकं निर्देशिका जारी यासें सवारी कर्जाया धितो मूल्यांकन अप्वयेकूगु खः ।

थ्वलिसें आः सर्वसाधारणं ३५ प्रतिशत डाउन पेमेन्टय् नीजि सवारीसाधन न्यायेफइगु जूगु दु । अर्थात् गाडी न्यायेत बैंकपाखें ६५ प्रतिशत ऋण काये फइगु जूगु दु । अथेहे, व्यक्तिगत विद्युतीय सवारी कर्जाया सीमा अप्वयेकाः ८० प्रतिशत थ्यंकूगु दु ।

अर्थात्, विद्युतीय सवारीसाधन खरिद याइम्ह व्यक्तिं २० प्रतिशत जक डाउन पेमेन्ट याःसा गाइगु जूगु दु ।

Categorized in बजाः