nepal investment baink

खुक्वःगु एसियाली जुरखानी कासाय् नेपाःयात छगू स्वर्णलिसें न्यागू कास्यपदक

नेवा: अनलाइन न्युज | २०७४ पौष ९, आइतबार १६:३७:०८

–उपेश महर्जन

फिलिपिन्सय् जुयाच्वंगु खुक्वःगु एसियाली जुरखानी कासाय् नेपालं छगू स्वर्णलिसें न्यागू कास्यपदक त्याकूगु दु । पुस ६ गतेनिसें न्ह्याःगु एसियाया १७ गू देसत समावेश कासाय् वीरगञ्ज निवासी कुन्दन साह नं छगू स्वर्ण त्याकादीगु खः ।

जुरखानीया कुस्ती विधाया ५० निसें ६० तौल समूहलय् साह नं इरानया कासामियात बुकाः स्वर्ण त्याकादीगु खः । जुराखानी कासा इरानपाखें हे न्ह्याःगु खः । वहे विधाय् ६० निसें ७० तौल समूहलय् इतागोल किपूया रोजन महर्जनं कास्यपदक त्याकादीगु खःसा चार्के चमानी विधाय् इतागोल किपूया हे रोजित महर्जनं कास्यपदक त्याकादीगु खः ।

यलया खोकनाया राजु महर्जनं कब्बडे विधाय् कास्यपदक त्याकादीगु खः ।

प्रशिक्षक रविन घिमिरेया नेतृत्वय् वंगु पुचलं समूहगत कासाय् स्वंगूगु थाय् त्याकेत ताःलाःगु खः । समूहगत कासाय् रोजन महर्जन, रोजित महर्जन, राजु महर्जन, रोहित महर्जन व कुन्दन साह नं कास्यपदक त्याकादीगु खः ।

उगु कासाय् ब्वति कायेत थ्यंकूम्ह मुकेश ठाकुर जक पदकविहिन जूगु खः । प्यन्हुया कासाया नितिं नेपाली कासामिया पुचः पुस ५ गते फिलिपिन्स प्रस्थान याःगु खःसा सोमवाः बहनी ७ ता इलय् त्रिभुवन अन्तर्राष्ट्रिय विमानस्थल थ्यनीगु ज्याझ्वः तयातःगु दु ।

येँय् आः नकतिनि जूगु सार्कस्तरीय जुरखानी कासाय् कास्यपदक त्याकादीम्ह रोजन महर्जनं नेपालं हःगु लिच्वः प्रशिक्षक रविन घिमिरे व नेपाली कासामियात कडा मिहेनतया फल जूगु जानकारी बियादीगु दु ।

Categorized in कासा