nepal life

क्षेत्र नम्बर ७ या जनतायात हिरो यायेगु रामवीर मानन्धरया चुनावी एजेण्डा

नेवा: अनलाइन न्युज | २०७४ कार्तिक २६, आइतबार १७:१८:१६

मंसीर २१ गते निक्वःगु चरणय् जुइगु प्रतिनिधिसभा निर्वाचन अन्तर्गत येँया क्षेत्र नम्बर ७ पाखें प्रतिनिधिसभा दुजःया नितिं मंकाः बामगठबन्धनया पाखें एमालेया नेता रामवीर मानन्धर व मंकाः लोकतान्त्रिक गठबन्धनया पाखें राप्रपाया नेता विक्रम थापा मू प्रतिस्पर्धीया रुपं दंवःगु दु ।

निगूगु संविधानसभाया निर्वाचनय् तत्कालीन माओवादी नेतृ हिसिला यमियात बुकाः राष्ट्रिय राजनीतिइ चर्चाय् वःम्ह रामवीर मानन्धरयात हे बामगठबन्धनं प्रतिनिधिसभाया नितिं उम्मेदवार दयेकूगु दु व वय्कः थुगु इलय् जित सुनिश्चितताया नितिं थःगु एजेण्डा व भावी योजना ज्वनाः मतदातापिन्थाय् वनेगु ज्या यानाच्वंगु दु ।

उगु क्षेत्रय् रामवीर मानन्धरया व्यक्तिगत लोकप्रियता व प्रभाव ला दु हे दु । उकी नं एमालेया सुदृढ संगठन माओवादी केन्द्रया लिसे व कांग्रेसं तकं थःत त्याकेमफइगु आँकलन यानाः राप्रपायात समर्थन याःगु हुनिं रामवीर मानन्धरयाजित निश्चित प्रायः जूगु जानकारपिन्सं धाःगु दु ।

लिसें वय्कलं विगतय् संसदया रुपं क्षेत्रया विकासया नितिं म्हितूगु भूमिकां नं वय्कःयात सशक्त उम्मेदवारया रुपं थंगु दु ।

वंगु स्थानीय तहया निर्वाचनय् येँया ७ नम्बरय् कांग्रेसं ११ हजार १५, एमालें ११ हजार ८५६, माओवादीं ३ हजार १ सय २० व राप्रपां १९ सय ६४ मत काःगु खः ।

अन वामगठबन्धनया पक्षय् १४ हजार ९ सय ७६ व लोकतान्त्रिक गठबन्धनया पक्षय् १२ हजार ९ सय ७९ मत लाःगु खः । अर्थात् अन वामगठबन्धन १९ सय ९७ मतं न्ह्यःने लाःगु दु । स्थानीय तहया मतया हे आधारय् नं वामगठबन्धन बल्लाः धैगु रामवीरया व्यक्तिगत लोकप्रियताया आधारय् मतान्तर अझ नं अप्वइगु अनुमान यायेफु धकाः धाःगु दु ।

येँ क्षेत्र नम्बर ७ पाखें छगू विज्ञप्ति पिथनाः हाकनं छाय् त्याकेगु येँया ७ नम्बर क्षेत्रया मतदातां रामवीर मानन्धरयात धैगु विषयस जानकारी ब्यूगु दु ।

उगु विज्ञप्तिइ धयातःगु दु, सम्भवतः न्हापांगु व्यवस्थापिका संसदय् दूगु ६०१ मध्ये रावीर जक छम्ह उज्वःम्ह सांसद खः, गुम्हेस्यां संसद विकास कोषपाखें वःगु वजेट खर्चया फुक्क ल्याःचाः पारदर्शी रुपं सार्वजनिक जक याःगु मखुकि उकिया मुक्कं विवरण पिथनाः जनताया छेँय् छेँय् थ्यंकूगु खः । ज्या यायेबलय् लोभ व लाभय् मखु जनताया आवश्यकतायात ध्यानय् तयाः वजेट बाँडफाँड यानादीगु खः ।

रामवीरया मेगु सशक्त पक्ष धैगु वय्कःया नैतिकता व चरित्रय् छुं दाग मलाःगु खः । गुलिखे सांसदत थःगु लाभया नितिं कमिशन व घुसखोरीइ चुर्लुम्म दुबेजूगु इलय् रामवीर मानन्धरं फुक्क आर्थिक क्रियाकलापयात पारदर्शी रुपं सार्वजनिक यानादिल व यदि सुनानं रामवीर मानन्धरं अनियमितता याःगु प्रमाणित यात सिंगो राजनीतिक जीवन हे परित्याग यायेगु सार्वजनिक रुपं घोषणा यानादीगु खः ।

कार्यकाल ज्वःछि हे संविधान निर्माणय् महत्वपूर्ण भूमिका ला म्हिता हे दिल लिसें क्षेत्रया विकासया नितिं माःगु समन्वय, सहकार्य व ग्वाहालिमिया रुपं वय्कलं निरन्तर भूमिका निर्वाह यानादिल । फलस्वरुप क्षेत्रं छुं नं छुं विकासया रुपरेखा कारेयायेत ताःलाःगु खः ।

रामवीर मानन्धरया मेगु म्हसीका धैगु अनियमितता व भ्रष्टाचारया विरुद्ध खरो रुपं विरोधय् क्वाहाँवःगु खः । दसूया रुपं छुं ई न्ह्यः जक जग्गा खरिद प्रकरणय् अनियमितताय् लाःगु नेपाल आयल नियगमया तत्कालीन कार्यकारी निर्देशक गोपाल खड्काया कर्तुत विरुद्ध वय्कलं सदन, मिडिया फुक्क ख्यलय् सशक्त सः थ्वयेकादिल । उकिया लिच्वः कथं मन्त्री परिषदपाखें गोपाल खड्का बर्खास्तीइ लाःगु खः ।

निक्वःगु संविधानसभाया निर्वाचनय् मूख्य त संविधान दयेकेगु कार्यभार लिसें निर्वाचित जूम्ह वय्कः विकास निर्माणय् नं उलि हे सक्रिय जुयादिल । आर्थिक विकास व समद्धि मू एजेण्डाया रुपं ज्वनाः जनताया दथुइ वनाच्वनादीम्ह वय्कः विकासया नितिं आःया सांसदया भूमिका स्थानीय व प्रान्तिय सरकारलिसे समन्वय यानाः अप्वः सिबें अप्वः जनचाहना अनुरुप ज्या यायेत समन्वयकारी भूमिका निर्वाह यायेमाःगु खँ धयादीगु दु । यदि वइगु निर्वाचनय् थः निर्वाचित जूसा क्षेत्र नम्बर ७ या जनतायात हिरो दयेकेगु योजना न्ह्यथनातःगु दु ।

स्वास्थ्य हे दकले तःधंगु धन खः धैगु खँयात मध्यनजर यासें सकल जनताया स्वास्थ्य विमा लिसें अस्पतालयास्तर उन्नति लिसें जनस्वास्थ्य सम्बन्धी मेमेगु थीथी योजनातय्त प्रभावकारी रुपं न्ह्यःने यंकेगु वय्कः रामवीर मानन्धरया योजना दु ।

शिक्षां हे जनताया चेतना स्तरयात मापन याइ, उकिं वर्तमान युग ल्वःगु २१ क्वःगु शताब्दीया प्राविधिक शिक्षाय् बः बिसें हरेक विद्यालयस ई–लाइब्रेरी व इ–लर्निङया माध्यमपाखें ब्वंकेगु व ब्वनेत माःगु पहल यायेगु वय्कःया योजना दु ।

क्षेत्र नम्बर ७ या जनतायात धनी व सम्पन्न दयेकेगु नितिं थीथी उद्योग संचालन यायेगु व उकिं रोजगारी सृजना यायेगु वय्कःया आज्जु दु । विशेष यानाः शिवपुरी नागार्जुनथें जःगु पर्यटकीय स्थलया प्रचारप्रसार व प्रबर्द्धन यायेगु लिसें येँया इतुंबहा नरदेवीथें जाःगु ऐतिहासिक सांस्कृतिक सम्पदातय्गु महत्व उजागर यानाः धार्मिक पर्यटनया विस्तार यायेगु लँपु, खानेपानीया विकास व विस्तार यायेगु, बागमती–विष्णुमती करिडोरया माध्यमपाखें सतक समस्या समाधान यायेगु, क्षेत्रयात स्मार्ट सिटी व स्याटलाइट सिटीइ रुपान्तरण यायेगु वय्कःया महत्वकांक्षी योजना दुसा क्षेत्रय् दूगु छगू जक कासा मैदानयात स्तर उन्नति यानाः खेलकुदय् माःगु विकास यायेगु योजना दु । क्षेत्रय् दूगु भ्यूटावरयात माःगु प्रचारप्रसार यानाः उकिया माध्यमं थप रोजगारी सृजना यायेगु वय्कःया योजना दु । उकिया लिसें पर्यटन, उर्जा व जैविक विविधताया उद्योगतय्त मू प्राथमिकताय् तयाः उकिया विकास व विस्तारय् भूमिका म्हितेगु रामवीर मानन्धरया योजना दु ।

हरेक खँय् सुझबुझ पूर्ण विचाः तयेगु, चेतनशील व विवेकी विचाः तइपिं नागरिक निर्माणया नितिं व इमिगु क्षमता विस्तारया नितिं माःगु ज्याझ्वःत संचालन यायेगु वय्कः रामवीर मानन्धरया योजना दु ।

Categorized in राजनीति