nepal life

कोरिया वनीपिं नेपाःमिपिन्त न्हूगु नियम

नेवा: अनलाइन न्युज | २०७४ पौष २२, शनिबार १२:४८:१५

दक्षिण कोरियाय् वनीपिं नेपाःमि ज्याकःमिया नितिं न्हूगु नियम लागू जूगु दु । निक्वःगुखुसि वर्किङ भिषाया अवधि पूमवंकूसे दथुइ हे ज्या त्वःताः लिहाँ वइपिं ज्याकःमिपिन्त स्वक्वःगुखुसि कोरिया वने मदइगु नियम कोरिया सरकारं हःगु दु ।

थुकिं थःगु कार्यकाल पूमवंकूसे वर्क परमिट क्यान्सिल यानाः वइपिं ज्याकःमि मर्काय् लाइ ।

ज्याकःमिं दथुइ हे कोरिया त्वःताः वयेगु क्रम अप्वयेधुंकाः कोरियन सरकारं थुज्वःगु निर्णय याःगु खः ।

निक्वःगु कार्यकाल पूमवंकूसे लिहाँ वइपिं ज्याकःमिं हाकनं वने मदइगु ईपीएस कोरिया शाखाया अधिकृत शोभाकर पराजुलीं जानकारी बियादीगु खः । वय्कलं धयादी, “आः सीभीटी परीक्षा बियाः कोरिया वंपिन्सं दथुइ हे भिषा क्यान्सिल यानाः वःसा हाकनं भाषा परीक्षा बिइ दइमखु । विदाय् वइपिनिगु हकय् थ्व नियम मदु । तर, जागिर हे त्वःताः लिहाँ वइपिन्त कोरियां मेगु मौका बिइमखु ।”

कोरियाय् न्हापांगुखुसि भाषा परीक्षा पास यानाः वंपिन्सं प्यदँ व झिला ज्या यायेखनी । निक्वःगुखुसि कम्युटरय् आधारित भाषा परीक्षा बियाः मेगु प्यदँ व झिलाया नितिं वनेखनी ।

तर, निक्वःगुखुसि वनीपिन्सं दथुइ हे थीथी हुनि क्यनाः ज्या त्वःताः लिहाँ वइपिं व हाकनं भाषा परीक्षा बियाः कोरिया वनीगु याःगु लुइकेधुंकाm रोक तःगु खँ सीदूगु दु ।

ईपीएस कोरिया शाखाया अधिकृत पराजुलीं धयादी, “ज्याकःमिपिं यंकीबलय् कम्पनीं अनया सरकारयात शुल्क नं पूगु जुइ । दथुइ हे ज्याकःमिपिन्सं त्वःताः स्वदेश लिहाँ वइबलय् कम्पनीइ जनशक्ति अभावं लिच्वःत लाःगु खनेदु । वं तत्काल हे ज्याकःमिपिं नं काये फइमखु । उकिं कोरियां दथुइ हे ज्या त्वःताः लिहाँ वनीगु क्रम पनेत थुज्वःगु नियम हःगु जुइमाः ।”

आःतक ईपीएस भाषा परीक्षा बियाः ५०,००० म्हसिबें अप्वः नेपाःमि कोरिया थ्यंकूगु दु ।

Categorized in लजगाः