nepal investment baink

कृष्णदेगःया पुनःनिर्माण खुलाया दुने क्वचाइगु

नेवा: अनलाइन न्युज | २०७४ कार्तिक १९, आइतबार १५:२९:१४

–गौतमबुद्ध बज्राचार्य

भुखाचं क्षतिग्रस्त जूगु यलया कृष्णदेगःया जीर्णोद्वार वइगु खुलाया दुने क्वचाइगु जूगु दु ।

पुरातत्व विभागया ग्वाहालिइ दच्छि न्ह्यः जीर्णोद्वार यायेगु ज्या न्ह्याकूगु स्वंगू तल्लाया उगु ल्वहँया देगः थ्यंमथ्यं ८० लखया लागतय् पुनःनिर्माण क्वचायेकेगु आज्जु दूगु काठमाडौं उपत्यका संरक्षण कोषया देसीय निर्देशक रोहित रंजितकारं जानकारी बियादीगु दु ।

देगःया निगूगु तल्लाय् क्षति जूगुया लिसें थां नं सरे जूगु हुनिं देगःया छुं ब्वया जीर्णोद्वार ज्या न्ह्याकूगुलि आःतक देगःया बच्छिसिबें अप्वः ज्या क्वचायेधुंकूगु धाःगु दु । ल्वहँ जक छ्यलाः निर्माण यानातःगु उगु कृष्णदेगः बि.सं. २०७२ बैशाख १२ ब्वःगु तःभुखाय् व वयां लिपा ब्वःगु लिभुखाचं छुं छुं ब्व चर्के जूगु खः ।

बि.सं. १६९३ स यलया जुजु सिद्धिनरसिंह मल्लं शिखर शैलीं निर्माण याःगु नीछग्वः गजू दूगु कृष्णदेगः दुने भगवान् कृष्ण व सत्यभामाया मूर्ति व दशअवतार, रामायण व महाभारतया बाखंलिसे सम्बन्धित चित्र व मूर्ति लिसें शिवलिंग दूगु विभाग हेरचार अड्डा यलया प्रमुख काजी प्याकुरेलं धयादीगु दु ।

वय्कःया कथं देगलय् न्हिथं नित्यपूजाया लिसें कृष्णाष्टमी व वैष्णव धर्मलिसे सम्बन्धित एकादसिइ विशेष पूजा जुइगु जुयाच्वंगु दु । कृष्णाष्टमीया दिं दँय् दसं राष्ट्राध्यक्षया उपस्थिति जुइगु नं जुयाच्वंगु दु ।

यल लायकूया आकर्षण ः

सुन्दरी चोकनिसें केशवनारायण चोक जुयाः यल संग्रहालयतकया मल्ल जुजुपाखें प्रत्यक्ष शासन यानाः वयाच्वंगु यल लायकू (दरबार)य् १८ औ शताब्दीया चक्रसम्भव व बज्रबाराही, १२ औं निसें १३ औ शताब्दीया पद्मपाणि लोकेश्वर व बसुन्धराया मूर्ति, १४ औं शताब्दीया शाक्यमुनि बुद्ध व पार्वतीया सच्छि व च्यागू (१०८) रुपमध्ये छगू कथं कयातःगु सिद्धिलक्ष्मीया मूर्ति पर्यटकपिनिगु आकर्षणया केन्द्र जुयाच्वंगु दु ।

अथेहे बि.सं. २०३५ सालपाखे फर्पिङय् लुयावःगु १३ औं शताब्दीया इन्द्रया ख्वाःपाः, १७ औं शताब्दीया हनु भैलःद्यःया ख्वाःपाः, चैत्य, स्वयम्भू स्तूप व बोधिसत्व लिसें यमराज प्रमुख खः ।

जुजु सिद्धिनरसिंह मल्लया लानीं नीलः जायेकेगु यानातःगु सुन्दरी चुक, मू चुक व तलेजु भवनीया देगलय् नं स्वदेशी व विदेशी पर्यटकपिनिगु भीड जुइगु जुयाच्वंगु दु । जुजु योगनरेन्द्र मल्लं ‘गुबलेतक जिगु छ्यनय् च्वंगु चखुंचा ब्वयाः वनीमखु, उबलेतक जि म्वानाच्वंगु दु धैगु सीकी’ धैगु विश्वास यानातःगु संग्रहालयया सूचना अधिकारी सुनिल भण्डारीं जानकारी बियादिल । उकिं योगनरेन्द्र मल्लया नितिं खाताय् लासा लायाः लिक्क बजां त्वनेगु ह्वखा तयेमाःगु खःसा थुगु प्रचलन आःतक नं दनि ।

दँय् दसं असोज महिनानिसें थ्यंमथ्यं स्वलातक विदेशी पर्यटकपिनिगु भीड जुइगु उगु यल लायकू क्षेत्र व यल संग्रहालयस वार्षिक १० लखसिबें अप्वः स्वदेशी व विदेशी पर्यटकपिं वइगु जानकारी संग्रहालयं ब्यूगु दु ।

विकास समिति ऐन अन्तर्गत वि.सं. २०५४ सालय् पलिस्था जूगु संग्रहालय थ्वसिबें न्हयः राष्ट्रिय धातुकला संग्रहालयया रुपं दूगु खः ।

७ औं शताब्दीनिसें २० औं शताब्दीतकया बहुमूल्य मूर्ति, धातु व ख्वाःपाः संग्रहालयस प्रदर्शनीया नितिं तयातःगु दु ।

विशेष यानाः यलया मूर्ति व कलाकृति अप्वः दूसा नं स्वनिगःलिसें तिब्बत व तराई क्षेत्रलिसेंया देय् न्यंकंया कलाकृति संग्रहालय दुने दु ।

भुखाचं क्षतिग्रस्त कृष्णदेगःया पुनःनिर्माण भुखाय् ब्वःगु छवाः लिपा हे न्ह्याःगु , भीमसेन देगः न्ह्यःनेया सिंह स्तम्भ, तलेजु देगःया दक्षिणी ब्व व सुन्दरी चुकया पूर्वी ब्वया नं निर्माण पूवनेधुंकूगु दु ।

उपिं फुक्क देगःया पुनःनिर्माण कोषं यानाच्वंगु व वं हे पुनःनिर्माण यानाच्वंगु मणिमण्डपया पुनःनिर्माण नं जूगु दु ।

Categorized in राष्ट्रिय