nepal life

किपू नपा अन्तर वडा बास्केट बल कासाय् १ व ९ वडा त्यात

नेवा: अनलाइन न्युज | २०७४ कार्तिक १२, आइतबार १४:२५:१४

७ क्वःगु अन्तर वडा बास्केट बल धेंधेंबल्ला कासाय् १ वडा व ९ वडां त्याकल । मिजंपिनिगु कासाय् १ वडां त्याकूगु खःसा मिसापिनिगु कासाय् ९ वडां त्याकूगु खः ।

वंगु असोज २३ गतेनिसें कीर्तिपुर बास्केट बल एकेदेमि व किपू नगरपालिकाया मंकाः ग्वसालय् उगु कासा न्ह्याःगु खः ।

फाइनल कासाय् मिजंपिनिगु कासाय् १ वडा व १० वडा दथुइ धेंधेंबल्ला जूगु खः । लिच्वः कथं १ वडाया ७० व १० वडा ३४ स्कोर जूगुलिं १ वडा न्हापं लाःगु खः ।

अथेहे, फाइनल कासाय् मिसापिनिगु कासाय् ९ वडा व ८ वडा दथुइ धेंधेंबल्ला जूगु खः । लिच्वः कथं ९ वडाया १२ व ८ वडा ८ स्कोर जूगुलिं ९ वडा न्हाप लाःगु खः ।

कासाय् बेष्ट प्लेयर कथं अनिल शाही व अप्वः स्कोर याःम्ह कथं सोम्यान महर्जन जुइत ताःलाःगु खः ।

ज्याझ्वलय् मूपाहाँ कथं किपू नगरपालिकाया मेयर रमेश महर्जनलिसें उपमेयर सरस्वती खड्का झायादीगु खःसा वय्कःपिनिगु ल्हाःतं त्याःगु वडाया पुचःयात ट्रफी, मेडल व दसिपौ लिसें भिंतुना देछानादीगु खः ।

न्हाप लाःगु पुचःयात पद्मकास्तपुर डिपार्टमेण्टल स्टोरं झिद्वः तका नगद सिरपाः लःल्हाःगु खःसा कविन्द्र निर्माण सेवापाखें नं न्हाप, ल्यू व लियांल्यू लाःगु पुचःयात नगद सिरपाः लःल्हाःगु खः ।

–रीदेन महर्जन, किपू

Categorized in कासा