नेवा: अनलाइन न्युज | २०७४ आश्विन २७, शुक्रबार १६:४७:४४

नेपाल जोरखाने खेलकुद संघं किपुली थ्यंमथ्यं ९२ करोड लागतय् बहुउद्देश्यीय स्टेडियम दयेकीगु जूगु दु ।

उकिया नितिं नेपाल जोरखाने खेलकुद संघ, अन्तर्राष्ट्रिय जोरखाने खेलकुद महासंघ व किपू नगरपालिका दथुइ बिहिवाः स्वंगू पक्षीय सम्झौता जूगु दु ।

नेपाल जोरखाने खेलकुद संघया नायः सुरेन्द्र मानन्धर व अन्तर्राष्ट्रिय जोरखाने खेलकुद महासंघया नायः तकं जुयादीम्ह इरानया पूर्व उपराष्ट्रपति मोहसेन मिरालिजादें आर्थिक ग्वाहालिया विषयस सम्झौता पतिइ ल्हाःचिं तयादीगु खः ।

मुक्कं लागतया ७५ प्रतिशत महासंघ व ल्यंदूगु २५ प्रतिशत संघं व्यवस्था मिलेयायेगु कथं सम्झौता जूगु नायः मानन्धरं त्रिपुरेश्वरय् च्वंगु युनाइटेड वर्ल्ड ट्रेड सेन्टरय् ग्वसाः ग्वःगु पत्रकार सम्मेलनय् जानकारी बियादीगु खः ।

अथेहे, नायः मानन्धर व किपू नगरपालिकाया मेयर रमेश महर्जनं जग्गा सम्बन्धय् सम्झौता पतिइ नं ल्हाःचिं तयादीगु खः । किपू नगरपालिका वडा ल्याः १० य् संघयात नगरपालिकां १८ निसें २० रोपनी जग्गा स्टेडियम निर्माणया नितिं उपलब्ध याकेगु मेयर रमेश महर्जनं धयादीगु दु ।

नायः सुरेन्द्र मानन्धरं याकनं हे वस्तृत परियोजना प्रतिवेदन डिपिआर तयार यानाः निर्माण ज्या न्ह्याकेगु धासें न्यादँया दुने निर्माण क्वचायेकेगु आज्जु दूगु खँ धयादिल ।

महासंघया नायः व इरानया पूर्व उपराष्ट्रपति मोहसेनं नेपाली जोरखानेया नितिं तःधंगु ह्वताः जूगु धासें जोरखाने संघयात निर्माण ज्याय् सक्रिय जुइत आग्रह यानादिल ।

जोरखाने संघया मूछ्याञ्जे रवि घिमिरे स्टेडियम जःखतय् जोरखाने स्टेडियम लिसें बहुउद्देश्यीय कभर्ड हल, स्वीमिङ पुल, आवास गृह, रेष्टुरेन्ट व जिम्नेजियम दइगु जानकारी बियादिल । मूछ्याञ्जे घिमिरें चीधंगु आकारय् ओलम्पिक एकेडेमिया अवधारणाय् स्टेडियम निर्माण यायेत्यनागु जानकारी बियादिल ।

Categorized in कासा