nepal life

कासा क्षेत्रया विकास अझ तीव्र जुइ ः नायः प्रचण्ड

नेवा: अनलाइन न्युज | २०७४ माघ २८, आइतबार १७:३६:२९

नेकपा माओवादी केन्द्रया नायः पुष्पकमल दाहाल प्रचण्डं राष्ट्र व जनताया आवश्यकता कथं थःम्हं न्ह्यात्थे जाःगु राजनीतिक निर्णय नं कायेफूगु धयादीगु दु ।

चितवनय् ग्वसाः ग्वःगु न्हापांगु प्रकाश दाहाल स्मृति राष्ट्रिय खेलकुद कासाया उलेज्या लिपा पत्रकारपिन्त बःचाधंगु प्रतिक्रिया बिसें नायः प्रचण्डं आःया सन्दर्भय् थःम्ह न्ह्यःने यंकागु उगु धापूया मेगु राजनीतिक अर्थ मयायेत नं आग्रह यानादिल ।

निगू पार्टी एकीकरणया सन्दर्भय् नायः प्रचण्डं धयादी, “जि येँय् वनेधुंकाः खँल्हाबल्हा जुइ । जिगु चाहना दु कि निन्हु स्वन्हुया दुने क्वचायेमा । थ्व खँ ताःहाकः मजुइमा ।”

वय्कलं न्ह्यःने धयादी, “पार्टी एकीकरण ताःहाकः जुइगुसिबें नं क्वचाइगु जिं खनाच्वनागु दु ।”

नायः दाहालं शनिवाः चितवनया भरतपुरय् ग्वसाः ग्वःगु छगू ज्याझ्वलय् देसया हित मजुइगु जूसा थःम्हं वांछ्वयेगु धयादिल । नेकपा एमाले व माओवादी केन्द्र दथुइ एकताया बैठक न्ह्यानाच्वंगु इलय् नायः प्रचण्डया थुज्वःगु प्रतिक्रिया पिहाँ वःगु खः ।

उगु खेलकुद कासा अन्तर्गतया प्यक्वःगु मुवा थाई व बृहत् तेक्वान्दो कासाया नायः प्रचण्डं उलेज्या यानादीगु खः ।

उगु लसताय् नायः प्रचण्डं वइगु दिनय् कासा क्षेत्रया विकास अझ तीव्र जुइगु विश्वास प्वंकादीगु खः । वय्कलं प्रादेशिक रुपं थुज्वःगु कासा जूगुलिं संघीयता कार्यान्वयनय् ग्वाहालि जुइगु नं धयादिल ।

थः न्हापांगुखुसि प्रधानमन्त्री जुयागु इलय् खेलकुद विकासया नितिं ज्या न्ह्याके जक खंगु व निक्वःगुखुसि प्रधानमन्त्री जुयागु इलय् देय् न्यंकं हे संस्थागत रुपं कासा क्षेत्रया विकासया नितिं पहल न्ह्याकागु नं वय्कलं लुमंकादिल ।

थःहे काय् प्रकाशया स्मृतिइ खेलकुद ग्वसाः ग्वःगुलिं ग्वसाः खलःयात वय्कलं सुभाय् देछानादिल ।

नेपाल मार्शल आर्टस् एकेदेमि व नेपाल राष्ट्रिय मुवा संघं कासाया ग्वसाः ग्वःगु खः । निन्हुतक न्ह्याइगु उगु मुवा थाई कासा अन्तर्गत आइतवाःया न्हापांगु कासाया नायः दाहालं अवलोकन यानादीगु खः ।

६० केजी तौल समूहया उगु कासाय् भारतया प्रेम कटनयात बुकुसें नेपाल आर्मीया गुण रुचाल त्याःगु खः । रुचालयात प्रचण्डं पदक क्वखायेकादीगु खः ।

उगु कासा अन्तर्गत इण्डो–नेपालय् ५०, ५६, ६०, ७०, ८१ व ९८ केजी तौल समूहलय् खुम्ह खुम्हेसिगु सहभागिता दइगु खः । अथेहे, मुवा थाईया राष्ट्रिय कासाय् मिजंपाखे ५५, ६०, ६५ व ७५ व मिसापाखे ६० केजी तौल समूहलय् यानाः ३६ म्ह कासामिपिनिगु सहभागिता दूगु नेपाल राष्ट्रिय मुवा संघया नायः गणेशलाल कक्षपतिं जानकारी बियादीगु खः ।

Categorized in कासा