nepal life

काय् म्ह्याय् व अबुया स्वापू ः कुशे अमाई

नेवा: अनलाइन न्युज | २०७४ भाद्र ५, सोमबार १५:३०:४२

थौ अबुया ख्वाः स्वयेगु दिं, कुशे अमाई जूगुलिं बजारय् आपालं हे कुश मिइगु नितिं तयातःगु खः ।

मदुपिं थः अबुया लुमन्तिइ श्राद्ध यायेत कुशया छ्यलाबुला याइगु जूगुलिं थौंया दिंयात कुशे अमाई धाःगु खः ।

थौंया हे दिं अबु दुपिन्सं सिसाबुसा, चाकुमरि, भ्वय् ज्वलंलिसें मतिनाया चिं तकं थः अबुयात बियाः अबुया ख्वाः स्वयेगु चलन नेपाली समाजय् ताःई न्ह्यवःनिसें न्ह्यानाः वयाच्वंगु खः ।

अबु मदुपिं काय् म्ह्याय्पिन्सं थः अबुया लुमन्तिइ अबुया नामय् चाकुमरि, सिसाबुसा, पालु, चि व दां तयाः देगलय् छायेगु व थः गुरुजुपिन्थाय् वनाः गुरुजुयात निसला बाय् दान बिइगु चलन नं ताःई न्ह्यवःनिसें न्ह्यानाः वयाच्वंगु दु ।

ब्याहा जुइधुंकूपिं म्ह्याय् मचातसें थः मदुम्ह अबुया नामय् उकथं हे सिसाबुसा, चाकुमरि, बजि, पालु, केरा, चि आदि तयाः गुरुजुयात बाय् देगलय् छायेगु याइसा अबु दुपिं म्ह्याय्पिं थःछेँय् अबुया ख्वाः स्वःवइसा अबुया नितिं साःसाःगु मरिचरी, भ्वय् ज्वलं, सिसाबुसालिसें मतिनाया चिं कथं वसः इत्यादी ज्वनाः सम्मान कथं अबुया ख्वाः स्वः वइगु याइसा काय्पिन्सं नं वहे रितिरिवाज कथं अबुया ख्वाः स्वयेगु चलन दु ।

अझ थौंकन्हय् ईया हिउपाः कथं अबुया ल्हाःतं केक तकं तायेकीगु चलन न्ह्याये धुंकूगु दु ।

किपाः नेवाः अनलाइन न्यूज

Categorized in राष्ट्रिय