nepal life

कांग्रेस येँ क्षेत्र नं. ९ पाखें लगमय् आमसभा

नेवा: अनलाइन न्युज – निश्चल | २०७४ मङ्सिर १८, सोमबार २०:२३:४९

मंसिर २१ गते जुइत्यंंगु निक्वःगु चरणया प्रतिनिधि सभा व प्रदेश सभा चुनावय् जनमत फ्वनेगु झ्वलय् नेपाली कांग्रेस प्रदेश ३, क्षेत्र नं. ९ पाखें येँया लगमय् छगू आमसभाया ग्वसाः ग्वल ।

पूर्वमन्त्री एवं नेपाली कांग्रेसया केन्द्रीय दुजः अर्जुननरसिंह केसी मूपाहां जुयादीगु सभाय् नेपाली कांग्रेसपाखें ३ नं. प्रदेश क्षेत्र नं. ९ पाखें प्रतिनिधि सभाया उम्मेदवार ध्यानगोविन्द रंजित, प्रदेश सभा १ या उम्मेदवार इन्द्रमान तुलाधर,  प्रदेश सभा २ या उम्मेदवार धर्मराज गौतम लिसें समानुपातिक व समावेशी प्रतिनिधित्व यानाः उम्मेदवार जुयादीपिं श्रीमिला सुवाल, समिता खड्गी श्रेष्ठ व नानु बास्तोलापिंसं थःपिंत मत बियाः त्याकेत जनसमुदाययात इनाप यानादिल ।

सभाय् न्ववानादीसें ध्यानगोविन्द रंजितं निर्वाचनयात जनमत कथं कयागु, थःपिनि संस्कार विपक्षीसिबें पाःगु व थःपिंसं दुःख सीमाःसां लिपाया पिंढीया निंतिं दुःख मजुइमाः धकाः थुगु जनमतय् ब्वति कयाः कांग्रेसयात त्याकेत आह्वान यानादिल ।

मूपाहांया थासं न्ववानादिसें अर्जुननरसिंह केसीं थुगु क्षेत्र नं. ९ पाखें निकःतक त्यायेधुंकूम्ह रंजितयात आः हाकनं त्याकाः थुगु लागायात लोकतान्त्रिक किल्ला दयेकेमाः धयादिल ।

थौं न्हिनय् तिनि जूगु कांग्रेस उम्मेदवार गगन थापा लक्षित बम आक्रमणया निन्दा व भत्र्सना यासें प्रत्यक्ष व समानुपातिकपाखें उम्मेदवार जुयादीपिंसं थुज्वःगु घटनां कांग्रेस मग्याइगु व चुनावय् जित हासिल यायेत जनतां साथ बीगु दाबी नं यानादिल ।

उगु सभाय् राप्रपा त्वःताः वःम्ह सर्जु रावतयात नं कांग्रेसय् लसकुस याःगु खःसा कुमारी स्कुलया मस्तय्सं थःगु सांगीतिक ज्याझ्वः न्ह्यब्वःगु व शैलेश शाक्यं चिनाखँ नं ब्वनाः न्यंकूगु खः ।