nepal life

कांग्रेस नेता लेखकया छेँय् नं बम

नेवा: अनलाइन न्युज | २०७४ मङ्सिर १९, मंगलबार ११:५२:२०

बाम गठबन्धन डडेल्धुराया प्रतिनिधिसभाया उम्मेदवार खगराज भट्टया गाडीइ नं बम प्रहार

कैलाली निर्वाचन क्षेत्र नम्बर ४ या बाम गठबन्धनया मंकाः उम्मेदवार लेखराज भट्टया छेँ लिक्क नं बम बिष्फोट

नेपाली कांग्रेसया नेता व कञ्चनपुर निर्वाचन क्षेत्र नम्बर ३ या प्रतिनिधिसभाया उम्मेदवार रमेश लेखकया भीमदत्त नगरपालिका भाँसीइ च्वंगु छेँ लिक्क वंगु चान्हय् बम बिस्फोट जूगु दु ।

बम बिष्फोटपाखें छेँय् छुं नं कथंया क्षति मजूगु जिल्ला प्रहरी ज्याकुथि कञ्चनपुरया प्रहरी नायब उपरीक्षक ज्ञानबहादुर सेटीं धयादिल । बम बिष्फोट यायेगु ज्याय् दुथ्याःपिनिगिु मालेगु ज्या जुयाच्वंगु वय्कलं धयादीगु दु ।

नेपाली कांग्रेसया पूर्व कञ्चनपुर जिल्ला कार्य समिति छ्याञ्जे भोजराज बोहरां नेता रमेश लेखकया छेँ लिक्क बम विष्फोटनया घटनाया विरोध याःगु दु । वय्कलं आपराधिक क्रियाकलापयात तत्काल नियन्त्रण यायेत तकं माग याःगु दु ।

थ्वहे झ्वलय्, चुनावी ज्याझ्वः क्वचायेकाः लिहाँ वयाच्वंगु इलय् बाम गठबन्धन डडेल्धुराया प्रतिनिधिसभाया उम्मेदवार खगराज भट्टया गाडीयात लक्षित यानाः वंगु चान्हय् ९ ता इलय् बम प्रहार याःगु दु । बम प्रहारपाखें गाडीइ सामान्य क्षति जूसां नं उम्मेदवार भट्टलिसें गाडीइ च्वनावःपिं फुक्क सकुशल जूगु धाःगु दु ।

अथेहे, कैलाली निर्वाचन क्षेत्र नम्बर ४ या बाम गठबन्धनया मंकाः उम्मेदवार लेखराज भट्टया छेँ लिक्क नं बम बिष्फोट जूगु दु ।

भट्टया छेँपाखें ३०० मिटर तापाक्क च्वंगु धलय् मंगलवाः सुथय् थ्यंमथ्यं ४ ता इलय् बम विष्फोट जूगु इलाका प्रहरी ज्याकुथि अत्तरियां जानकारी ब्यूगु दु । बम विष्फोटपाखें छुं नं क्षति मजूगु प्रहरीं जानकारी ब्यूगु दु ।

Categorized in दुर्घटना-अपराध