nepal life

कांग्रेस थथे जुया बुत !!!

नेवा: अनलाइन न्युज | २०७४ मङ्सिर २६, मंगलबार १२:३६:०९

संविधानसभापाखें न्हूगु संविधान दयेकेधुंकाः जूगु प्रतिनिधि व प्रदेशसभा निर्वाचनय् नेपाली कांग्रेसं बांमलाक्क पराजय भोगेयाःगु दु । एमाले व माओवादी केन्द्र बाम गठबन्धन यानाः चुनावी प्रतिस्पर्धाय् क्वाहाँ वयेधुंकाः कांग्रेसया प्रभावशाली नेतात हे निर्वाचनय् बूगु दु ।

निर्वाचन लिच्वः थःगु पक्षय् लाइगु अड्कल याःपिं कांग्रेसया नेतात हे पराजित जुल । याउँक हे चुनाव त्याइगु विश्लेषण याःगु क्षेत्रय् हे पराजय भोगेयाःगु दु कांग्रेसं  । दकले अप्वः आश याःगु प्रदेश नम्बर ७ या लिच्वः नं कांग्रेसया पक्षय मवल । उकि नं कैलाली, कञ्चनपुरय् कांग्रेस शून्य जूवंगु दु । कांग्रेस राजनीतिया विरासत हे मानेयानातःगु मोरङय् पार्टि छगू सिटय् सीमित जूवंगु दु ।

छाय् बुत ले कांग्रेस ? संसदया निगूगु व स्वंगूगु दल चुनावी तालमेल यानाः वनेगु निर्णय लिपा उकी मन्ह्यंगु दलयात कःघानाः कांग्रेसं लोकतान्त्रिक गठबन्धन निर्माण यायेगु कुतः जूगु खः । तर, उकी कांग्रेस सफल जुइमफुत । उकिया लिच्वः प्रदेश २ लय् दकले अप्वः लाःगु दु । निगू राप्रपालिसे चुनावी तालमेल यायेगु पार्टी केन्द्रीय निर्णययात नेता कृष्णप्रसाद सिटौलां भंग याःबलय् उकिया लिच्वः झापाय् प्रत्यक्षरुपं लाःगु दु । उकिं तालमेल जूगु थासय् नं आशंका ब्वलंकल ।

निगू तःधंगु दल तालमेल यानाः चुनावी प्रतिस्पर्धाय् क्वाहाँवःगु इलय् कांग्रेसं मतदातापिन्त आकर्षण व भलसा बिइ मफुत ।

मुलुकया आर्थिक, सामाजिक व राजनीतिक हिउपाःया नितिं विगतय् थःपिन्सं ब्यूगु योगदानया चर्चा यायेत नं कांग्रेसं मफुत । वर्तमानय् आशा क्यनेत व भविष्यप्रतिया भलसा ब्वलंके मफया नं न्हूपिं मतदाता कांग्रेसपाखें तापाक्क च्वन । सरकार गठन व विघटनया कासापाखें आजित जनता ‘स्थिर सरकार व आर्थिक समृद्धिया नितिं मतदान’ धैगु बाम गठबन्धनया नारां प्रभावित जूवन ।

भारतं नेपाःयात तःगु नाकाबन्दीया इलय् झीगु पोजिसनं जनताया तःधंगु पंक्ति आक्रोशित जूगु न्यंकूसें कांग्रेस नेता गगनकुमार थापां धयादी, “गुलिखे सही निर्णय यात तर जनताय् थ्यंकेमफुत ।”

पार्टी सभापति तकं जुयादीम्ह प्रधानमन्त्री शेरबहादुर देउवाया छवि जनताय् सकारात्मक मदु । निर्वाचन प्रचारय् देय् दौडाहाय् पिहाँ वंम्ह देउवायात जनतां पत्याः मयात । उलि जक मखु वं पार्टीं याःगु व यायेत्यंगु ज्या व योजनायात ध्वाथुइक बुझे नं यायेमफुत व मस्वल । वं ग्याःचिकुया राजनीतियात निर्वाचनया मू अस्त्र दयेकल । तर, जनतां उकियात विश्वास मयात । जनतायात भलसा ब्वलंकेगु व प्रभावित यायेफुपिं नेताया खडेरी कांग्रेसय् खनेदत ।

मतदातापिन्त म्हिगः सुनां छु यात सिबें नं कन्हय् छु याइ धैगु खँंपाखें प्रभावित याइगु धासें गगन थापां धयादी, “थ्व निर्वाचनय् जनतायात थथे याये धैगु जिमिसं भलसा बिइ मफुत ।”

अथेहे, बाम गठबन्धन दुनेया असन्तुष्टिया फाइदा कायेत नं कांग्रेसं मफुत । निगू दलया नेता व कार्यकर्ता छप्पं जूबलय् निर्णायक हैसियत तइपिं मतदाना नं वाम गठबन्धनपाखे वनी धैगुपाखे कांग्रेसं आकलन तकं यायेमफुत । राजनीतिक संस्कार, लगानी व मूल्य मान्यतासिबें च्वये च्वंपिं नेतापिन्त प्रभाव यायेफुम्ह मनू पार्टीइ हाबी जुयाः कांग्रेसप्रति जनताया मोह भंग जूवंगु अवस्थाय् चुनावय् वनेमाःबलय् कांग्रेसयात घाटा जुल ।

अथेहे एमाले व माओवादीं अख्तियार दुरुपयोग अनुसन्धान आयोगया तत्कालीन प्रमुख लोकमानसिंह कार्की विरुद्ध महाभियोग प्रस्ताव हःबलय् कांग्रेस पक्ष बाय् विपक्षय् दने मफुत । महाभियोग प्रस्ताव दर्ता जूगुलिं उकिया पक्ष वा विपक्षय् मदंगु कारण वं जनतायात थुइके मफुत । उकिं भड्के जूपिं मतदातापिन्त तत्कालीन प्रधानन्यायाधीश सुशीला कार्की विरुद्ध संसदय् पेश महाभियोग प्रस्तावं झन रुष्ट यानाबिल । सहरिया मतदाता नं तापानाः वन ।

वामपन्थी निगू तःधंगु दल छप्पं जुयाः निर्वाचनय् वंगु अवस्थाय् कांग्रेसं काःगु मतयात अस्वाभाविक माने यायेमज्यूगु धासें गगन थापा विगत प्यदँया दुने संविधान निर्माण, शान्ति प्रक्रिया क्वचायेगु लिसेंया जिम्मेवारीइ अल्भे जुइमाःगुलिं नं पार्टीं सांगठनिक विस्तार यायेमफूगु धयादी । वय्कलं धयादी, “पार्टीया छुं गलत निर्णय जुल, जिमिसं यानागु बांलाmगु ज्या नं जनता दथुइ थ्यंके मफुत । पार्टी नेतृत्वप्रति चरम अविश्वास व इलय् सही निर्णय याये मफूगुया परिणाम नं निर्वाचनय् हार जूगु खः । सेन्ट्रल म्यासेज कयाः जिपिं वनेमफुत ।”

संविधानप्रति असन्तुष्ट मधेसी, आदिवासी जनजातिया मागयात सम्बोधन यायेत कांग्रेस संविधान संशोधनया पक्षय् दन । प्रदेश सीमांकनलिसें संविधान संशोधन कुतः याःबलय् असन्तुष्ट पक्षया नं साथ व ग्वाहालि मजुल  धाःसा विपक्षय् दुपिन्सं नं साथ त्वःतल । मधेसया पक्ष काःबलय् पहाडया मतदाता तं चाल । मधेसया समस्या समाधान यायेत पार्टीं याःगु कुतः मतदातातक थ्यंके मफुबलय् अनया जनतां कांग्रेसयात विश्वास मयात । गुकिं यानाः कांग्रेसयात पहाड व मधेस निगुलिं थासं साथ मबिल ।

ताःहाकःगु संघर्ष व समृद्ध विगत जूगुलिं प्रवृत्ति हिल धाःसा कांग्रेसयात हाकनं नं जनतां अवसर बिइगु गगन थापां दाबी यात । वय्कलं धयादी, “गम्भीरतापूर्वक समीक्षा यायेमाः व थःपिन्त गन सच्चेयायेगु धैगु सीकेमाः । उकियात प्रण यानाः ज्या न्ह्यःने यंकेमाः । आः व ई वःगु दु ।”

कांग्रेसय् २०१५ सालनिसें सुरु जूगु अन्तर्घातयात २०५० सालया उपनिर्वाचनं संस्थागत याःगु खः । तर, पार्टी स्थापनाया ७० दँय् तुलनात्मक रुपं आः दकले अप्वः एकताबद्ध जुयाः कांग्रेसं निर्वाचनया सामना याःसां नं परिणाम अनपेक्षित वल ।

(ने.सं. ११३८ मंसीर २६ गते नागरिक न्हिपती पिदंगु बुखँ)

Categorized in पत्रपत्रिका