नेवा: अनलाइन न्युज | २०७४ आश्विन ८, आइतबार १०:३९:१२

थौंकन्हय् उसाँय मदया छेँसः च्वना च्वंम्ह कलाकार ज्ञानेन्द्र ईशारा महर्जनयात वयकया योगदानया कदर यासे यल सम्मान २०७४ लःल्हागु दु ।  यल ईण्टरटेण्टमेण्ट प्रा।लि। व हामीलाई सम्झनोस नेपालया मंका ग्वसालय् म्हिगः शनिवाः यलया अशोक हलय् कलाकार ईशारा व मेपिं अनाथ  , असहाय व विपन्न मस्तय् निंतिं ग्वाहालि जुइकथं जूगु नेवाः संकिपा “साइको”या च्यारिटी शो व साँस्कृतिक ज्याझ्वलय् थथे कलाकार ईशारायात यल सम्मान लःल्हागु खः । उगु ज्याझ्वलय्  कलाकार ईशारा थः म्हमफुगुलिं उपस्थित जुया मदीसा वयकःया सम्मान वयकःया चिधिकम्ह म्ह्याय् समिना महर्जनं लःल्हाना कयादीगु खः ।

वयकःयात हना कथं नीद्वतका दाँ व हनापौ मूपाहाँ नेपाल चलचित्र कलाकार संघया वरिष्ठ उपाध्यक्ष नांजाम्ह कलाकार सानु ताम्राकारं लःल्हाना दीगु खः । अथेहेतुं कलाकार ज्ञानेन्द्र ईशारायात आर्थिक ग्वाहालि कथं कलाकार मय्जु लक्ष्मी गिरीं नं द्वछीतका दाँ देछानादीगु खः ।

ज्याझ्वलय् संकिपा “साइको”या कलाकार , प्राविधिक व ग्वाहालिमिपिन्त पाहाँ कथं झायादीम्ह नांजाम्ह सिने पत्रकार विजयरत्न असंबरें मतिनाया चिं लःल्हानादीगु खः । सेफ्स होटेल तालिम केन्द्रया दीलिप कुमार महर्जनया सभानायसुइ न्ह्याःगु उगु ज्याझ्वलय् वयकलं थःगु कम्पनीं विपन्न वर्गपिन्त शिप बिया च्वनागु खँ कनादिलसा पाहाँ असंबरे अथे हे यल ईण्टरटेण्टमेण्ट प्रा.लि. व हामीलाई सम्झनोस नेपालया भिं चिउताया प्रशंसा याना दिल । ज्याझ्वलय् लायन्स क्लब अफ काठमाण्डौं चन्द्रागिरीपाखें विपन्न मस्तय्त चिकुलाया निंतिं स्वेटर नं इने ज्याः जूगु खः । ज्याझ्वःया संयोजक व “साइको”या च्वमि व निर्देशक गौतम तण्डुकार , लायन टंक नाथ ढकाललगायतया वक्तपिन्सं नुगः खँ तयादीगु खःसा कलाकारपिं गौतमरत्न तुलाधर व किशोर शाही , सिलु संकिपाया हिरो जय श्रेष्ठपिं नं पाहाँ कथं झायादीगु खः ।

Categorized in नेवाः