nepal life

कलंकी अन्डरपासया ज्या ४० प्रतिशत क्वचाल

नेवा: अनलाइन न्युज | २०७४ कार्तिक १५, बुधबार १२:३९:३४

९ महिना लिपा संचालनय् हयेगु आज्जु

कलंकी अन्डरपास जुन २०१८ तकया दुने संचालनय् हयेगु कथं निर्माण ज्या धमाधम न्ह्यःने यंकाच्वंगु दु । आःतकया दुने ४० प्रतिशत ज्या क्वचायेधुंकूगु दु ।

येँया चक्रपथ सुधार आयोजना प्रमुख ज्ञानेन्द्र झाया कथं चिनियाँ कम्पनी सांघाई कन्स्ट्रक्सनं अन्डरपास निर्माण यानाच्वंगु दु । उगु खण्डया पाइलिङया आः नकतिनि क्वचाःगु दु ।

कलंकी–बल्खु खण्डय् आः कंक्रिटाइजेशनया ज्या जुयाच्वंगु दु । चा चीकेगु ज्या नं धमाधम दुसा स्ल्याब तयेधुंकूगु दु ।

जुलाई २०१८ न्ह्यः हे ज्या क्वचायेकेगु आज्जु चिनियाँ कम्पनीया दु । उगु योजना चीन सरकारया हे ग्वाहालिइ निर्माणाधीन जुयाच्वंगु खः ।

८०० मिटर ताःहाकःगु अन्डरपासमध्ये आः बल्खुपाखे अधिकांश ज्या क्वचायेकाः सीतापाइलापाखेया निर्माणय् तीव्रता बियाच्वंगु दु ।

आयोजना प्रमुख झाया २० न्हु थुखे चिनियाँ कम्पनीं ज्याय् तीव्रता ब्यूगु खः । झा नं धयादी, “तर, ई सीमाय् ज्या क्वचायेकेत ज्या याइपिं कामदारपिं थप यायेमाःगु स्थिति दु । ज्या याइपिं कामदार यायेत धयाच्वनागु दु ।”

बल्खु खसीबजाःपाखें वःगु सवारी साधनयात वहे मार्गं सीतापाइलातक थ्यनीगु व्यवस्था मिले यायेत्यंगु खः । खसीबजाःपाखें थक्वाः व सोल्टीमोडपाखे वनीगु सवारी साधनं धाःसा आः संचालन जुयाच्वंगु तसक हे छ्यलाबुला यायेमालीगु जुइ ।

थक्वाः व कालिमाटी वये वनेगु सवारी साधनत अन्डरपासया च्वय् पाखें गुडे जुइ । थुकिया निर्माण ज्या ल्यं दनि ।

चिनियाँ कम्पनीं निर्माण ज्या न्ह्याकूबलय् वा वइगु ई वर्षातय् पूर्ण रुपं ज्या दिकेगु धाःगु खः ।

आयोजना प्रमुख झाया कथं वर्षातय् पूर्ण रुपं ज्या रोक्का मजुल । वय्कलं धयादी, “ज्या सुस्त जूगु खः,, २० दिं थुखे हाकनं तीव्रता वःगु दु ।”

तःभुखाय् व भारतया नाकाबन्दीया हुनिं उगु निर्माण ज्या दच्छि लिपा लाःवंगु खः । सुरुवातया सम्झौताय् जनवरी २०१७ य् हे ज्या क्वचाइगु न्ह्यथनातःगु खः ।

स्वनिगलं पिहां वनेबलय् जुइमा बाय् दुहां वयेबलय्, आः कलंकीया जामय् फसे जुइमालाच्वंगु दु । छघौ जाम ला कलंकीइ सामान्यथें हे जुइधुंकल । तर, अन्डरपास निर्माण जुइधुंकाः उगु समस्या तनी ।

आः थक्वाःपाखें वइगु सवारी साधन कालिमाटीपाखे वनेत व बल्खुपाखें वःगु सवारी साधन सीतापाइलापाखे मोडे जुइबलय् ट्राफिक जाम जुइगु जुयाच्वंगु दु ।

निगुलि पाखे वइगु सवारी साधनं छगू हे सतक छ्यले माःगुलिं बेफाइदा जुयाच्वंगु खः थ्व । अन्डरपास पाखें थक्वाःपाखें कालिमाटी वये वनीगु सवारी साधन बिना जाम निर्वाध गन्तव्यपाखे वनेत अःपुइगु जुइ ।

Categorized in स्थानिय-समाज