nepal life

कतारय् कुमारी बैंक बुम रेमिटया सांगितिक ज्याझ्वः

नेवा: अनलाइन न्युज – विजयरत्न | २०७४ पौष २६, बुधबार १७:२२:०७

संगीक्षा फिल्म्स इन्टरटेन्टमेन्ट प्रा.लि.या ग्वसालय् वइगु मार्च ८ व ९ तारिक निन्हुयंकं कतारया निगू सहरय् छगू तःजिगु सांगितिक ज्याझ्वः जुइगु जूगु दु ।

कुमारी बैंक व बुम रेमिटया प्रायोजनय् जुइगु उगु ‘कुमारी बुम सुपर स्टार नाइट्स २०१८’ य् नेपाःया नांजाःपिं कलाकारपिन्सं ब्वति काइगु खँ बुधवाः छगू प्रेस मिट यानाः जानकारी ब्यूगु दु ।

आपालं नेपाःमिपिं च्वनाः वयाच्वंगु कतारय् जुइत्यंगु उगु सांगितिक ज्याझ्वः बांलाक्क हे ताःलाइगु खँ ग्वसाः खलकं दाबी याःगु दु ।

कुमारी बुम सुपर स्टार नाइट्स २०१८ य् ब्वति कायेत नेपाःया नांजाःम्ह हिरोइन निरुता सिंह नं कतार थ्यनीगु जूगु दुसा उगु ज्याझ्वलय् नांजाःम्ह कमेडी स्टार जितु नेपाल, नांजाःम्ह म्येहालामि आनन्द कार्कीया लिसें युवराज चौलागाई, अनिल सिंह, हेमन्त शर्मा, सन्तोष राज, रितकुमार श्रेष्ठथें जाःपिं गायक व संगीतकार राजनराज सिवाकोटीया नापनापं राधिका हमाल, एन्जीला रेग्मी, सेलिना कुँवर व कोरियोग्राफर शंकर बिसीथें जाःपिं कलाकारपिन्सं ब्वति काइगु खँ बुधवाः जूगु प्रेस मिटय् जानकारी ब्यूगु दु ।

उगु प्रेस मिटय् ग्वसाः खलः संगीक्षा फिल्म्सया मनोज केसी, प्रायोजकपिं कुमारी बैंकया उमेश सिंह भण्डारी, बूम रेमिटया सृजना रायमाझी व धीरेन्द्र पन्त, नेपाल टेलिकमया बरिष्ठ इन्जिनीयर दिनेशचन्द्र पन्त लिसें चलचित्र पत्रकार संघया नायः सन्दिप सापकोटा व संकिपा निर्देशक मिलन चाम्स पाहाँ कथं उपस्थित जुयादीगु खः ।

Categorized in कला