nepal life

कट्टरवादया भुलभुलैया जक मलाः ला ? (विचाः च्वसू)

नेवा: अनलाइन न्युज | २०७४ पौष २, आइतबार १५:११:०६

चुनावय् इलय् प्रचार प्रसारया दौरानय् नेपाः पार्टीया थाय् थासय् सभा यानाच्वंगु सकसिनं खंगु हे जुइफु तर उज्वःगु सभाय् न्वःवाइपिं बाहेक न्यनीपिं न्याम्ह हे मखाइगु अवस्था नं सकसिनं वाःचाः हे जुइ । म्वःम्वः नेवाःत दुगु थासय् नेवाःतय् नितिं धकाः हालाः जूगु दलया सभाय् न्यनीपिं न्याम्ह हे खाके मफुसा भोट मवल धकाः नेवाःतय्त हे ब्वःबियाया अर्थ मदु । थ्व गनं नेवाः नेवाः धकाः धयाजूगु कट्टरपनयात नेवाःतसें हे स्वीकार मयाःगु खःकि ?

–सानुराजा शाक्य

नेवाः, तामाङ, राई, लिम्बु, थारुतय् धकाः धाःगु पार्टीतसें छाय् व समुदायया हे पार्टी जुइमफुत । संघया चुनावय् तीन प्रतिशतया थ्रेस होल्ड दुगुलिं काः म्वाःला देय् न्यंकया मतय् उज्वःगु पार्टीत थ्यने मफुत धायेकाः तर थःपिं अल्याख ल्याखय् च्वनाच्वंगु थाय् दुथ्याःगु प्रदेशय् तकं छगूत्याः प्रतिशत हे भोट काये मफु धइगुया अर्थ छु । उकिं जातीय समुदायया नामय् जक दल स्वनेवं तुं सफल जुइमखु धइगु दृष्टान्त नकतिनि क्वचाःगु चुनावं क्यन ।

आदिवासी जनजाति समुदायया अलग अलग पहिचानया लिधंसाय् स्वनातःगु दलत थ्व चुनावं विघटनया अवस्थाय् थ्यनी धइगु चुनाव न्ह्यः हे सिउ अथे खःसांतबि उज्वःगु दलतसें नं प्रतिस्पर्धाया नामय् गनं तत् समुदायया हे बेइज्जत जकं यानाच्वन कि धकाः दुवाले माःगु अवस्था दु ।

पहाडी लागाय् फुक्क आदिवासी जनजातिया दलया दावी याइगु संघीय फोरम तकं पहाडी लागाय् सफल मजुल । गनं थुकथं ल्ह्वनाच्वनागु मुद्दायात सम्बन्धित जातीय समुदायया जनतां हे तिरष्कार याःगु छाय् धकाः मनन यानाः रणनीति हिलेमाः ।

चुनावय् इलय् प्रचार प्रसारया दौरानय् नेपाः पार्टीया थाय् थासय् सभा यानाच्वंगु सकसिनं खंगु हे जुइफु तर उज्वःगु सभाय् न्वःवाइपिं बाहेक न्यनीपिं न्याम्ह हे मखाइगु अवस्था नं सकसिनं वाःचाः हे जुइ । म्वःम्वः नेवाःत दुगु थासय् नेवाःतय् नितिं धकाः हालाः जूगु दलया सभाय् न्यनीपिं न्याम्ह हे खाके मफुसा भोट मवल धकाः नेवाःतय्त हे ब्वःबियाया अर्थ मदु । थ्व गनं नेवाः नेवाः धकाः धयाजूगु कट्टरपनयात नेवाःतसें हे स्वीकार मयाःगु खःकि ?

थ्वहे अवस्था थारु, राई, लिम्बु, तामांगतय्गु नं खः । मगः व गुरुङतय् नामय् हे अलग्ग पार्टी खनेमदुसां मगःतय् बाहुल्यता दुगु धाःगु जनमुक्ति नं प्रदेशय् तकं थःगु अस्तित्व माःजुइमाःगु अवस्थाय् थ्यन । थुकियाःअःख मधेसी दलत चुनाव न्ह्यः हे छगू हे दल राजपा दयेकाःचुनाव ल्वाःगुलिं उपिं थःगु अस्तित्व रक्षा यायेत जक मखु दुई नं. प्रदेशय् बहुमत हयेत तकं सफल जुल । तर आदिवासी जनजातिया अगुवा धाःपिसं चायेकातःगु दलया नेतातय् थःगु अहम, घमण्ड व दुरदर्शिताया अभावं थौं अस्तित्वहीन जुयाः वनेमाल ।

आदिवासी जनजाति आन्दोलन सघन रुपं जूगु थाय् धाःगु राई लिम्बुत सघन रुपं च्वनाच्वंगु १ नं. प्रदेश, नेवाःतामांगत सघन रुपं दुगु ३ नं. प्रदेश व गुरुङ, मगः व थारुत सघन रुपं दुगु ४ व ५ नं. प्रदेशय् हे नेकपा एमालेया सानदार बिजयी जुल । थुकथं विजयी जूगु कारण गनं आदिवासी जनजाति समुदाय नं जातीय कट्टरवादयात स्वीकार मयाःगुया अर्थ काःगु दु ।

नकतिनि क्वचाःगु संघ व प्रदेशया लिच्वःयात दुवाले बलय् ३ नं. प्रदेशया प्रत्यक्ष चुनावय् प्रदेश सभाय् झिंप्यम्ह नेवाःत प्रदेशसभाय् थ्यनेत ताःलात । झिंप्यम्हमध्ये एमालेपाखें गुम्ह नेवाः, कांग्रेसया स्वम्ह व माओवादी केन्द्र व नेमकिपाया  छम्ह छम्ह नेवाः जक प्रदेशसभाय् थ्यंगु खः । उकथं हे तामांग गुम्ह जक थ्यंगु दु । प्यम्ह तामांग कांग्रेसपाखें, एमाले व माओवादी केन्द्रपाखें निम्ह निम्ह व नयाँशक्तिपाखें छम्ह थ्यंगु खः ।

नेवाः नं नेवाः म्हस्युपिन्त जक भोट बिउ धकाः जुलुस यायेबलय् उगु जुलुस असनं इन्द्रचोक तक जक सीमित अवस्थाय् स्वनिगलं पिनें छम्ह नं नेवाः प्रदेश सभाय् निर्वाचित जुयावःगु मदु । थुज्वःगु अवस्थाय् नेवाःताम्सालिंग प्रदेश नां छुइगु चर्चा नं चर्चाय् हे जक सिमित जुइगु अवस्था दु ।

Categorized in बिचा: