नेवा: अनलाइन न्युज | २०७४ बैशाख १५, शुक्रबार ०९:५६:०६

वैदेशिक रोजगारया प्रलोभनय् लाकाः नेपाली मिसापिन्त १ लखसिबें अप्वः दां बियाः मीपिं गिरोहया प्यम्ह दुजः ज्वंगु दु ।

प्रहरी केन्द्रीय अनुसन्धान ब्युरोया पुचलं भारतया दिल्ली जुयाः नेपाली मिसापिन्त ओमान यंकाः मीगु यानाच्वंगु अभियोगय् तोकबहादुर तामाङ, मेदनीप्रसाद प्रसाई व निमा लामायात ज्वंगु खः । थ्वसिबें न्ह्यः हे वहे गिरोहया विष्णु लाम गिरफ्तार जूगु खः ।

ब्युरोया एसपी मीरा चौधरीया कथं प्रारम्भिक अनुसन्धानय् इमिसं नेपाःया थीथी नाकापाखें भारतया दिल्ली थ्यंकाः हवाइमार्ग जुयाः मिसापिं ओमान छ्वयेगु याःगु धाःगु दु । चौधरीं धयादी, “थुकिया बापत इमित ओमानया दलालं प्रति महिना १ लख ३० हजार तका दां बिइगु यानाच्वंगु सीदूगु दु ।”

ज्वंपिं नेपालय् च्वनाः वैदेशिक रोजगारीइ वनेगु कुतलय् दुपिं मिसापिं मालेगु, इमित बांलाःगु ज्याया प्रलोभनय् लाकाः ओमान वनेत राजी याकेगु व पासपोर्ट दयेकाः भारतया दिल्लीतक छ्वयेत सक्रिय जुयाच्वंपिं खः ।

(नागरिक न्हिपती पिदंगु बुखँ)

Categorized in पत्रपत्रिका