nepal life

एमाले नेता राईयात बम आक्रमण धुंकाः ओलीया प्रतिक्रिया

नेवा: अनलाइन न्युज | २०७४ कार्तिक २८, मंगलबार १२:०५:२८

मंगलवाः चुनाव प्रचार प्रसार याःवंगु इलय् भोजपुर–१ ट्याम्केमैयुम नगरपालिका–७ गुम्बा धैगु थासय् नेकपा एमालेया प्रभावशाली नेता व भोजपुर–१ या प्रदेशसभा दुजः उम्मेदवार शेरधन राईयात जूगु बम आक्रमणया नेकपा एमालें कडा शब्दं निन्दा याःगु दु ।

नेता राई नेकपा एमाले प्रदेश नम्बर १ या संहसंयोजक तकं जुयाच्वनादीम्ह खः । उगु बम आक्रमणया घोर निन्दा यासें एमाले नायः केपी ओलीं छगू विज्ञप्ति हे पिथनाः राईयात जूगु सांघातिक बम आक्रमणयात पार्टीं गम्भीरतापूर्वक कयागु खँया जानकारी ब्यूगु दु ।

ओलीं आक्रमणयात थःम्हं मुक्कं एमाले पार्टी पंक्तियात जूगु आक्रमणया रुपं कयागु धासें घटनाय् न्ह्याम्हेसिगु संलग्न दूगु जूसां नं इमिगु आज्जु लोकतन्त्रयात संस्थागत जुइके मबीगु, निर्वाचनयात स्यंकेगु व मुलुकयात भाँडभैलो यानातयेगु स्पष्ट जूगु धयादीगु दु ।

विज्ञप्तिइ बामगठबन्धनया उम्मेदवारपिन्त छम्ह लिपा मेम्ह यासें आक्रमणया घटना जुयाच्वंगुलिं थः अजूचायाच्वंगु धासें ओलीं उज्वःगु कथंया घटनाप्रति गम्भीर जुइत सरकारयात ध्यानाकर्षण याकूगु दु ।

Categorized in राजनीति