nepal life

एमाले उम्मेदवार शेरधन राईया गाडीइ बम मुइकल, अंगरक्षक घाःपाः

नेवा: अनलाइन न्युज | २०७४ कार्तिक २८, मंगलबार ११:३४:१९

शेरधन राईया अंगरक्षक प्रहरी सहायक निरीक्षक डिल्ली देवकोटाया ल्हातय् घाःपाः, गाडी पूर्णरुपं क्षति, राई सकुशल

नेकपा एमालेया नेता व भोजपुर प्रदेशसभाया उम्मेदवार नेता शेरधन राईयात लक्षित यानाः भोजपुरय् बम आक्रमण याःगु दु ।

जिल्लाय् च्वंगु गोवनेया आमसभायात सम्बोधन यायेत वनाच्वंगु इलय् स्थानीय पिखुवा धैगु थासय् राईयात लक्षित यानाः बम प्रहार याःगु खः ।

प्रहरीया कथं राई च्वनावंगु गाडीइ बम क्ययेकूगु खः । घटनाय् राई सकुशल जूगु तर वय्कःया अंगरक्षक प्रहरी सहायक निरीक्षक डिल्ली देवकोटाया ल्हातय् घाःपाः जूगु जानकारी ब्यूगु दु ।

गाडी पूर्णरुपं क्षति जूगु दु । नेत्रविक्रम चन्द नेतृत्वया नेकपाया घटनाय् संलग्ना दूगु प्रहरीं आशंका याःगु दु ।

लिपांगु दिनय् नेकपां खोटाङया थीथी उम्मेदवारपिनिगु घरजग्गा तकं कब्जा याःगु दाबी यानाः वयाच्वंगु दु । अथेला रुकुम व रोल्पाय् नं माओवादी केन्द्रया उम्मेदवारपिन्त आक्रमणया कुतः जूगु खः ।

Categorized in दुर्घटना-अपराध