nepal life

एमालेया उम्मेदवार डन दीपक मनाङ्गे

नेवा: अनलाइन न्युज | २०७४ कार्तिक ८, बुधबार १३:२७:१६

एमालें प्रदेशसभा निर्वाचनया नितिं मनाङय् गुन्डा नाइके दीपक मनाङ्गे (राजीव गुरुङ)यात उम्मेदवार यायेगु तयारी याःसां नं लिपांगु इलय् विवाद जुयाः खण्डा लामा गुरुङयात उम्मेदवार ल्यःगु दु । टिकट कायेमखंम्ह मनाङ्गें प्रदेशसभा निर्वाचन क्षेत्र ‘ख’पाखें स्वतन्त्र उम्मेदवारी ब्यूगु दु ।

स्वतन्त्रपाखें उम्मेदवारी ब्यूसां नं खण्डायात ‘ब्याक’ यानाः अझ नं दीपक मनाङ्गेयात हे लिपांगु इलय् न्ह्यःने यंकेगु तयारी एमालेया दु ।

एमाले ४ ल्याः प्रदेश कमिटी दुजःतकं जुयाच्वंम्ह मनाङया नेता ट्रिपल पी गुरुङं चाःहीकाः दिपकयात हे न्ह्यःने हयेगु सम्भावना दूगु खँ धाःगु दु ।

नेता ट्रिपल पी गुरुङं दिपकयात अःपुक लँपु चालेफूगु धयादिसें धयादी, ‘खण्डा एमालेया सामान्य कार्यकर्ता खः । तर, गननं विवाद मजुइमा धकाः जक जिमिसं खण्डायात हयागु खः ।’

खुले जुयाः हे न्वःमवाःसां नं पार्टीं लिपांगु इलय् दिपकयात न्ह्यःने हयेगु तयारी जुयाच्वंगु धाःगु दु । मनाङ एमालेया छम्ह नेता धयादी, “खासय् एमालेया मू उम्मेदवार हे दिपक मनाङ्गे खः । वयात खनेदयेक न्ह्यःने हयेबलय् मछिनिगु जूगुलिं खण्डायात न्ह्यःने क्यंगु जक खः ।”

उम्ह नेताया कथं लिपांगु इलय् खण्डाया उम्मेदवारी फिर्ता याकेत पहल जुयाच्वंगु दु । कार्यकर्ताया कथं खण्डासिबें ‘हेभिवेट’ नेतायात उम्मेदवार दयेकेबलय् फिर्ता याये मफइगु जूगुलिं कमजोर उम्मेदवार जूम्ह खण्डायात न्ह्यःने हःगु खः ।

स्वतन्त्र उम्मेदवार जूम्ह दिपक मनाङ्गें खण्डायात राजनीतिइ सिबें व्यापारय् जमे जूगु  धाःगु दु । दिपक मनाङ्गें धाःगु दु, “राजनीतिसिबें नं सामाजिक ज्या व व्यापारय् खण्डा अतिकं हे जमे जुयाच्वंगु दु । वहे जुयाः नं खण्डाया च्यूताः राजनीतिइ म्हो जक दु ।” दिपक मनाङ्गेया कथं खण्डा गार्मेन्ट ब्यापारी खः ।

खण्डा व थः लिक्कया नातेदार जूगु तकं मनाङ्गें धाःगु दु । मनाङ्गे व खण्डाया नाता तता व किजा खः ।

मनाङ्गें धाःगु दु, “मनाङय् पार्टीसिबें नं छेँजःया राजनीति स्वइ । गुम्हेसिया छेँजः तःधं जुइ, वं हे त्याकी ।”

मनाङ्गें थःपिनिगु छेँजःया आकार तःधंगु जूगुलिं नं थःम्हं स्वतन्त्र उम्मेदवारी बियागु धाःगु दु । मनाङ्गें धाःगु दु, “लिपांगु इलय् सहमतिइ तता किजामध्ये पाखें छम्ह उम्मेदवार जुइगु जुइ । ततां नं जितः हे उम्मेदवार जुइत दबाब बियादीगु दु ।”

सुं युवा कार्यकर्तापिन्सं एमालें तप्यंक उम्मेदवार मदयेके धुंकाः थःपिन्त स्वतन्त्रपाखें उम्मेदवार जुइत दबाब ब्यूगु वं धाःगु दु । एमालेलिसे सुनां उम्मेदवारी फिर्ता कायेगु धैगु विषयस सहलह जुयाच्वंगु वय्कलं धयादिल ।
वय्कःया कथं निम्हं उम्मेदवार चुनावी मैदानय् वनेबलय् निम्हं हे पराजित जुइगु अवस्था वइगु जूगुलिं छम्ह जक मैदानय् क्वाहां वनेगु धाःगु दु ।

मनाङ्गें धाःगु दु, “जितः निर्वाचनय् क्वाहाँ वनेत कानूनी रुपं छुं नं पंगः मदु । पिने हल्ला जूथें समस्या मदु । जिं आपालं मुद्दा त्याकेधुनागु दु । संगठित अपराध व सम्पत्ति शुद्धीकरणय् द्वपं लाःसां नं उकिया आधार छुं मदु । उग फुक्क मुद्दा आः खारेज जूगु दु ।”

राप्रपाया जिल्ला नायः तकं जुयाच्वंम्ह मनाङ्गे छुं ई न्ह्यः एमालेय् दुहाँ वंगु खः । राप्रपा कुचा कुचा जुइधुंकाः थःपिन्सं एमालेयात समर्थन यानागु मनाङ्गें धाःगु दु ।

एमाले प्रदेश ४ या सहसंयोजक गणेश तिमिल्सेनां नं कानूनी ल्याखं मनाङ्गें बारे विवाद पिहाँ वयेधुंकाःवया पलेसा खण्डायात उम्मेदवार दयेकूगु धाःगु दु ।

वं नं स्थानीय नेतृत्वं आवश्यकता जूसा खण्डायात फिर्ता याकाः मनाङ्गेयात उम्मेदवार दयेके फइगु सम्भावना दूगु धाःगु दु । खण्डायात फिर्ता याकाः मनाङ्गेयात हयेगु बाय् महयेगु धैगु आः हे निर्णय मजूनिगु धाःगु दु ।

(थौं ने.सं. ११३७ कार्तिक ८ गते नागरिक न्हिपती पिदंगु बुखँ)

Categorized in पत्रपत्रिका