nepal life

एनसेलया टावरय् बम विस्फोट

नेवा: अनलाइन न्युज | २०७४ फाल्गुण १, मंगलबार १२:४४:३८

पूर्वी चितवनया रत्ननगर नगरपालिका वडा ल्याः ६ बछ्यौलीइ च्वंगु एनसेलया टावर व उपकरणय् सोमवाः चान्हय् अज्ञात पुचलं कुकर बम विस्फोट याःगु दु ।

रत्ननगर इलाका प्रहरी ज्याकुथिया प्रमुख प्रहरी नायव उपरीक्षक बासुदेव खतिवडाया कथं चान्हय् थ्यंमथ्यं १२ ता इलय् बम विस्फोट जूगु खः ।

विस्फोटनपाखें एनसेलया उपकरणय् क्षति जूसां नं टावय् धाःसा छुं मजूगु वय्कलं धयादीगु दु ।

विप्लव नेतृत्वया नेपाल कम्युनिष्ट पार्टीया कार्यकर्तापिन्सं विस्फोट याःगु जुइफूगु प्रहरीं अनुमान याःगु दु । स्थानीय शिवनारायण चौधरीया जग्गा बालं कयाः एनसेलं उपकरण व टावर जडान यानातःगु खः ।

प्रहरी नायव उपरीक्षक खतिवडां एनसेलया बिटिएस तयातःगु अधिकांश थाय् मानव बस्ती म्हो जूगु थासय् लाःगु व सुरक्षागार्ड तयामतःगु हुनिं सुरक्षा समस्या खनेदूगु धयादीगु दु ।

घटना लिपा थःम्हं पूर्वी क्षेत्रय् च्वंगु अधिकांश विटिएस निरीक्षण यानाबलय् सुरक्षाया व्यवस्था सम्बन्धित कम्पनीं मयाःगु सीदूगु वय्कलं धयादीगु दु ।

Categorized in दुर्घटना-अपराध