nepal life

उम्मेदवारपिनिगु भ्वय् ः न्याँ व खाचाया ला

नेवा: अनलाइन न्युज | २०७४ मङ्सिर २०, बुधबार १३:४५:२७

प्रतिनिधिसभा व प्रदेशसभाया निर्वाचनया नितिं २४ घौ सिबें म्हो ई ल्यंदुबलय् रौतहटया उम्मेदवारपनिगु बेचैनी अप्वःगु दु । मौन ईया उल्लंघन यासें उम्मेदवारपिं मतदाता प्रभावित यायेगु ज्या सक्रिय जूगु दु ।

गढीमाई नगरपालिका–६ धरमपुरय् कांग्रेस व राजपा कार्यकर्ता दथुइ ल्वापु जूगु दु ।

कांग्रेस कार्यकर्तां खाचा इनेत्यंगु धासें राष्ट्रिय जनता पार्टी (राजपा)या कार्यकर्तां विरोध याःबलय् ल्वापु जूगु खः । ल्वापुइ लानाः राजपाया स्थानीय नेता विशम्भर राय यादव व नन्दु यादव घाःपाः जूगु दु ।

इपिं निम्हेसित जिल्ला अस्पताल गौरय् वासः यायेगु व्यवस्था मजुयाः वीरगञ्ज छ्वःगु खः ।

घटनाय् दुथ्याःपिं निम्हेसित प्रहरीं ज्वंगु दु ।

धरमपुर छगू प्रतिनिधि गाँं जक खः, जिल्लाया आपालं मतदातापिनिगु छेँय् छेँय् उम्मेदवारं न्याँ व खाचा थ्यंकूगु दु ।

प्रायः गरिब व दलित बस्तीतय्गु मतदाता ह्ययेकेत उम्मेदवापिन्सं ला व अय्लाः इनेगु ज्या याःगु खः ।

व्यापारीपिन्त धाःसा लिमलाः फमलाः जुयाच्वंगु दु । गरुडा बजारय् च्वगु ला पसलय् चान्हय् १ ता ईतक खाचाया ला तयार यायेगु यानाच्वंगु दु ।

३५० किलो खाचाया लाया अर्डर वयेधुंकाः पसः थुवालं चान्हय् निसें ह ला तयार यायेगु ज्या याःगु खः ।

निगू क्वीन्टल न्याँया ला अर्डर वःगुलिं न्हिनय् १२ ता ईतक न्याँ थ्यंकेत लिमलाः फमलाः जूगु खः धकाः गौर बजाःया छम्ह न्याँ ब्यापारीं धाःगु दु ।

‘उम्मेदवारया भ्वय् दु वहे जुया ।’ ला सिबें दंगु जूगुलिं उम्मेदवारपिन्सं न्याँया लाय् हे अप्वः बः बिइगु याःगु खः ।

आःसिबें स्थानीय निर्वाचनय् अप्वः ब्यापार जूगु न्याँ व्यवसायीपिनिगु धापू दु ।

स्थानीय प्रशासनं अलय् मीगु ज्याय् रोक तःसां नं प्रायः फुक्क थासय् अय्लाः अःपुक हे न्याये मीगु यानाच्वंगु दु ।

अनुगमन व निगरानी याइगु निकायत सुस्त जुयाः भ्वय् व अय्लाः मीगु ज्या पने फयाच्वंगु मदु ।

Categorized in राजनीति