nepal life

उत्तर कोरिया शीतकालीन ओलम्पिक कासाय् सहभागी जुइगु

नेवा: अनलाइन न्युज | २०७४ पौष २५, मंगलबार १४:४७:१४

उत्तर कोरियां दक्षिण कोरियाय् जुइगु शीतकालीन ओलम्पिक कासाय् थःपिन्सं ब्वति कायेगु खँया जानकारी ब्यूगु दु ।

निगू कोरियादथुइ मंगलवाः दक्षिण कोरियाय् जूगु वार्ता लिपा उत्तर कोरियां उगु जानकारी ब्यूगु खः ।

उत्तर कोरियां थःपिनि कासामि व प्रतिनिधिपिं फेब्रुअरीइ जुइत्यंगु उगु शीतकालीन ओलम्पिक कासाय् सहभागी जुइगु छ्वइगु क्वःछ्यूगु जानकारी ब्यूगु दु ।

उगु खेलकुदय् उत्तर कोरियां छ्ययेगु धाःगु उगु टोलीइ कासामि, प्रतिनिधि व समर्थकया लिसें मेमेपिं नागरिक नं दुथ्याइगु उत्तर कोरियाया वार्ता टोलीया छम्ह दुजलं दक्षिण कोरियाया राजधानी सोलय् जानकारी ब्यूगु खः ।

उत्तर कोरिया व दक्षिण कोरियाया उच्च अधिकारक्ष्पिं दथुइ सन् २०१५ लिपा अर्थात् निदँ न्ह्यः न्हापांगुखुसि वार्ता जुइधुंकाः उगु घोषणा जूगु खः ।

मंगलवाः जूगु इमिगु सहलहस विेशष यानाः उगु हे खेलकुदया विषयस अप्वः खँल्हाबल्हा जूगु खः । सहलहया विषयवस्तुतय्गु सीमितता दूगु धाःगु दु ।

इमिगु सहलह दक्षिण कोरियाय् जुइगु धाःगु उगु शीतकालीन ओलम्पिकय् उत्तर कोरियाया कासामिपिन्त गुकथं सहभागी याकेगु धैगु विषयस आपालं मात्राय् केन्द्रीत जूगु खः ।

उगु निगू देय् दथुया वार्ता दक्षिण कोरियाया अधिनय् दूगु निगू कोरियाली सीमा क्षेत्रय् च्वंगु पानुमजोम नगरय् जूगु खः ।

उगु बैठकया निष्कर्षया विषयस छुं धाःगु मदुनि । तर उत्तर कोरियां धाःसा उगु खेलकुदय् सहभागी जुइगु जानकारी न्हापा हे ब्यूगुलिं वार्ताया लकस बांलाःगु धाःगु दु ।

Categorized in कासा