नेवा: अनलाइन न्युज | २०७४ पौष ३, सोमबार १२:४७:५५

नेपालय् सर्वाधिक राशिया क्रिकेट कासा एभरेष्ट प्रिमियर लिग (ईपिएल) थौं सोमवाःनिसें किपूया अन्तर्राष्ट्रिय क्रिकेट मैदानय् न्ह्याःगु दु ।

त्रिभुवन विश्वविद्यालयया मैदानय् राउण्ड रोविन लिगया आधारय् संचालन जुइगु कासाय् खुगू टिम सहभागी जूगु दु ।

उलेज्या कासाय् येँया किङ्स इलाभेन व यल पेट्रियट्स दथुइ धेंधेंबल्ला जूगु दु । किङस इलाभेनया नेतृत्व सोमपाल कामी व पेट्रियट्सया नेतृत्व ज्ञानेन्द्र मल्लं याःगु दु ।

वलिसें पारस खड्काया कप्तानीइ विराटनगर वारियर्स, शक्ति गौचनया कप्तानीइ पोखरा राइनोज, शदर भेषावकरया कप्तानीइ भैरहवा ग्लाडियटर्स व दिपेन्द्र सिंह ऐरीया कप्तानीइ चितवन टाइगरं नं कासाय् ब्वति काःगु दु ।

लिग चरणय् प्रत्येक टिमं थःथवय् म्हिती । लिगय् शीर्ष जुइगु निगू टिम दथुइ न्हापांगु क्वालिफायर जुइ ।

जित ल्हातय् लाकूगु टि फाइनलय् थ्यनी । बूगु टिमं फाइनल  वनेगु नितिं तेस्रो व चौथो टिमदथुइया विजेतालिसे निगूगु क्वालिफायर कासा म्हितेगु ह्वःताः कायेखनी ।

कासाया विजेतां २१ लख नगद सिरपाः त्याकेखनी ।

टिमय् १५ म्ह कासामि दइगु व फुक्क टिमं स्वम्ह विदेशी कासामि म्हितके खनीगु व्यवस्था यानातःगु दु । गुगुमध्ये नेपाःया १० म्ह कासामिया अक्सन (कासामि किनबेच) पाखें ल्यःगु दु । विनोद भण्डारी, आरिफ शेख, सन्दिप लामिछान व करण केसी सर्वाधिक रकमय् बिके जूगु खः ।

कासा स्वयेगु नितिं साधारण दर्शकपिन्त टिकट मू १०० तका दां तयातःगु दु । विद्यार्थीपिन्सं ५० प्रतिशत छूट कायेखनी ।

कासाय् मनोरञ्जनात्मक ज्याझ्वः नं जुइ । थर्ड अम्पाएर, चियर्स लिडर व उत्कृष्ट साउण्ड सिस्टमया व्यवस्था यानातःगु ग्वसाः खलकं जानकारी ब्यूगु दु । मैदानयात आकर्षक रुपं समाः यानातःगु दु ।

कासामि, भीभीआईपी, भीआईपी व संचारकःयिा नितिं नं विशेष व्यवस्था यानातःगु दु ।

Categorized in कासा