nepal life

इलाम नगरपालिकाय् गुफा लुयावल ः मनूतय्गु भीड

नेवा: अनलाइन न्युज | २०७४ कार्तिक २३, बिहिबार १५:०३:५५

इलाम नगरपालिका–६ स गुफा लुयावःगु दु । ओढारे भालुढुंगा सामुदायिक वन क्षेत्रय् उगु गुफा लुयावःगु खः । भालुढुंगा ओढारया हे न्ह्यःनेपाखें २० मिटर पश्चिमपाखेया पहरा क्वय् उगु गुफा लुयावःगु खः ।

ओपिधारा–चियाबारी–भालुढुंगा क्षेत्र पर्यटन प्रबर्द्धन विकास समितिया पदाधिकारीं भालुढुंगा क्षेत्रय् पर्यटकीय विकासया नितिं थप सम्भावना मालेगु झ्वलय् भालुढुंगाया हे पहराय् गुफा लुयावःगु नायः हरि गुरुङं जानकारी बियादीगु दु ।

समितिया हे छ्याञ्जे डम्बर गुरुङ व समितिया पदाधिकारी अर्जुन कँडेल गुफा दुने दुहाँ वनाः पिहाँ वयेधुंकाः प्रतिक्रिया बिसें गुरुङं धयादी, “मेगु छगू गुफा लुयावःगु दु । थनया पर्यटन विकासय् थुकिं सेतुया ज्या याइगुलि जि विश्वस्त जुयागु दु ।”

उगु गुफाया आःतक नामाकरण याःगु मदुनि । ओढारे भालुढुंगा थेंहे न्हूगु गुफा दुने दुहाँ वनेगु ह्वः चीधं जूसां नं दुने दुहाँ वनेधुंकाः दनेज्यूगु व न्यासि वनेज्यूगु थाय् दूगु जानकारी नं ब्यूगु दु ।

गुफाया २० मिटर दुनेतक थःपिं दुहाँ वनागु जानकारी बिसें कँडेलं धयादी, “अन भुखाय् बाय् छुं हुनिं दथुइ ल्वहँ कुतुंवयाच्वंगुलिं लँपु बन्द जुयाच्वंगु दु । जिपिं समिति हे न्ह्यलुवाः जुया छुं ई दुने हे उगु पंगः चीकेगु सोचय् दु ।”

समितिया दुजः तोया ढकालं गुफा दुने अत्यधिक ल्याखय् चिकंलाबा (चमेरा) लुयावःगु जानकारी बियादीगु दु । भालुढुंगा पर्यटन क्षेत्रया प्रबर्द्धनया नितिं हरि गुरुङया नेतृत्वय् उगु क्षेत्रय् ज्या न्ह्याये धुंकाः आः न्हिथं सलंसः ल्याखय् आन्तरिक पर्यटक दुहाँ वनेगु यानाच्वंगु दु ।

Categorized in स्थानिय-समाज