nepal life

इरानय् ६.० रेक्टर स्केलया भुखाय् ब्वल

नेवा: अनलाइन न्युज | २०७४ मङ्सिर १५, शुक्रबार १७:१५:०९

इरानया दक्षिणपूर्वी इलाकाय् आपालं लिच्वः लाक्क शुक्रवाः ६.० म्याग्निच्युडया भुखाय् ब्वःगु इरानया प्रेस टेलिभिजनं जनकारी ब्यूगु दु ।

उगु भुखाय् केरम्यान प्रान्तीय राजधानी करेम्यान सहर लिक्क केन्द्रविन्दु जुयाः ब्यःगु जानकारी ब्यूगु दु ।

उगु सहर लिक्क आपालं गामय् उगु भुखाय्या कम्पन महसूस याःगु व मनूत ग्याःचिकुं छेँपाखें पिहाँ वयाः सतकय् वःगु जानकारी ब्यूगु दु ।

तर आःतक उगु भुखाचं मानवीय क्षति व भौतिक क्षतिया छुं नं जानकारी धाःसा मवःनिगु प्रेस टिभीं जानकारी ब्यूगु दु ।

इरानय् वंगु नोभेम्बर १२ स बवःगु ७.३ रेक्टर स्केलया भुखाचय् लानाः कम्ती नं ४७० म्हसिबें अप्वः मनूतय्गु ज्यान वंगु खः ।

उगु भुखाचं यानाः गुद्वःसिबें अप्वः मनूत घाःपाः जूगु खः । उगु भुखाचं केम्यानशाह प्रान्तय् झिंखुद्वःखा छेँ क्षतिग्रस्त जूगु खः ।

सन् १९९० या जुन १ य् इरानया इतिहासय् दकले ग्यानापुगु भुखाय् ब्वःगु खः । उगु भुखाचय् लानाः कम्ती नं स्वीन्हयद्वःम्ह मनूतय्गु ज्यान वंगु खः ।

अथेहे, केरम्यान प्रान्तया बामय् सन् २००३ या डिसेम्बरय् ब्वःगु भुखाचय् लानाः कम्ती नं स्वीछद्वःम्ह मनूतय्गु ज्यान वंगु खः ।

Categorized in अन्तर्राष्ट्रिय