nepal life

इन्डोनेसियाय् सतक दुर्घटनाय् लानाः २७ म्ह मनूत सित

नेवा: अनलाइन न्युज | २०७४ माघ २८, आइतबार १७:०७:३६

जाकार्ताया इन्डोनेसियाया पश्चिमी जाभा प्रान्तय् शनिवाः छगू तच्वःगु दुर्घटना जूगु दु ।

उगु दुर्घटनाय् लानाः कम्ती नं २७ म्ह मनूतय्गु ज्यान वंगु दुसा मेपिं १८ म्ह तच्वकं घाःपाः जूगु दु ।

यात्रुबाहक बसं मोटरसाइकलयात ठक्कर बिइधुंकाः दुर्घटना जूगु प्रहरी व अस्पतालया अधिकारीपिन्सं आइतवाः सुथय् जानकारी ब्यूगु खः ।

सुबाङ जिल्लाया सिसेनाङ धैगु थासय् दुर्घटना जूगु धाःगु दु । बसं मोटरसाइकलयात ठक्कर बिइधुंकाः यात्रुबाहक उगु बस छगू पहाडय् वनाः न्याःवंगु खः ।

उगु दुर्घटनाय् आपालं मनूत पीडित जूगु घटनास्थलपाखें छम्ह प्रहरी अधिकारीं हनिवाः जानकारी ब्यूगु खः ।

दुर्घटनाय् लाःगु उगु बसय् ४५ म्ह यात्रुपिं च्वनावःगु खः । प्रहरीया कथं घटनाया बारे अनुसन्धान जुयाच्वंगु दु ।

‘सुबाङ जनरल हस्पिटलं’ २७ म्ह मनूत सीधुंकूगु धलः सार्वजनिक याःगु दु । अथेहे मेपिं १८ म्ह तच्वकं घाःपाः जूगु नं अस्पतालं धाःगु दु ।

घाःपाः जूपिन्त ‘आइसियु’स तयाः वासः यानाच्वंगु दु । घाःपाः जूपिं मध्ये आपालं म्हगःया थीथी थासय् क्वँय् त्वःधूगु व छ्यनय् घाःपः जूगु वासः यायेगुलि दुथ्याःम्ह चिकित्सकपिन्सं जानकारी ब्यूगु दु ।

घाःपाः जूपिं आपालं मनूतय्गु अवस्था तःच्वः जुयाच्वंगु हुनिं सीपिनिगु ल्याः अप्वयेफूगु नं प्रहरीं अनुमान याःगु दु ।

Categorized in अन्तर्राष्ट्रिय