nepal life

आः अय्लाःया विषयस नं डिग्री यायेदइगु !

२०७४ जेठ २५, बिहिबार ०९:२०:५६

संसारया दकले थिकेगु अय्लाः कम्पनीं चायेकल अय्लाः कलेज !

संसारया दकले थिकेगु अय्लाः उत्पादक कम्पनी केवेइचो माउताईं छगू विश्वविद्यालय पलिस्था यायेत्यंगु दु । अय्लाः कम्पनीं चायेकीगु उगु विश्वविद्यालयस अय्लाःजन्य पेय पदार्थया हे  विषयस विद्यार्थीपिन्सं अध्ययन यानाः डिग्री हासिल यायफइगु व्यवस्था यायेत्यंगु दु ।

चिनियाँ सरकारी अय्लाः कम्पनी माउताईं चायेकीगु उगु विश्वविद्यालया नां माउताई विश्वविद्यालय खः । दक्षिणी ग्वान्झाउ प्रान्तया रेन्हुई सहरय् उगु विश्वविद्यालय पलिस्था यायेत्यंगु खः । शिक्षा मन्त्रालयपाखें सम्बन्धत प्राप्त यायेधुंकाः विश्वविद्यालयस अध्ययन न्ह्याइगु जूगु दु ।

न्हापां स्थानीय ६०० म्ह विद्यार्थीपिं भर्ना कायेगु ग्वसाः ग्वयातःगु दु व इमिसं विश्वविद्यालयस वाइन उत्पादन, खाद्य गुणस्तर, खाद्य सुरक्षाथें जाःगु पाठ्यक्रम ब्वनेखनीगु जूगु दु ।

२ करोड ८० लख डलरया लागतय् पलिस्था जुइगु विश्वविद्याल १३ हेक्टर क्षेत्रफलय् कःघानाः पलिस्था यायेत्यंगु खः ।

चिनियाँ पेय पदार्थ कम्पनीतसें दक्ष जनशक्तिया अभाव जुयाच्वंगु अवस्थाय् थ्व विश्वविद्यालयं दक्ष जनशक्ति उत्पादनय् ग्वाहालि याइगु विश्वास काःगु दु ।

माउताई ब्राण्डया अय्लाःयात चीनय् राष्ट्रिय पेय पदार्थ कथं कयातःगु दु व राष्ट्रिय समारोहतय्के उगु अय्लाः अनिवार्यथें जुयाच्वंगु दु । लिसें चिनियाँ सरकारी अधिकारीपिन्सं विदेशी पाहाँपिन्त बिइगु उपहारया रुपय् नं थ्वहे अय्लाः छ्यलीगु यानाच्वंगु दु ।

तर लिपांगु इलय् थुगु थिकेगु अय्लाः घुसया रुपं बिइगु वस्तु तकं जुइधुंकाः थ्व विवादय् तकं लानाः वयाच्वंगु दु । सन् २०१४ स भ्रष्टाचार विरुद्ध सरकारं कडा रुपं छ्यूगु पलाःलिपा माउताई अय्लाःया मिइगु ज्याय् ह्वात्त हे क्वाहां वःगु खः ।

माउताई ब्राण्डया अय्लाःया मू अतिकं थिके । छगः बोटल माउताईया मू १३,०० युआन अर्थात् १६६ अमेरिकी डलर तू । थुगु ब्राण्डया अय्लाःया ९५ प्रतिशत विक्री चीन दुने हे जुइगु जुयाच्वंगु दु ।