nepal life

अमेरिकाया टेक्सासय् च्वंगु चर्च दुने गोली चलेजुल, २७ म्ह सित

नेवा: अनलाइन न्युज | २०७४ कार्तिक २०, सोमबार १३:२५:०४

अमेरिकाया टेक्सास प्रान्तया छगू चर्चय् लाक्वपाक्व गोली प्रहार जुयाः २७ म्ह मनूत सीगु दु । गोली कयाः गुलिं मनूत घाःपाः जूगु दु ।

आइतवाः सन्डरल्याण्ड स्प्रिङ्सया विलसन काउन्टी इलाकाय् फस्ट वाप्टिस्ट चर्चय् प्रार्थना सभा जुयाच्वंगु इलय् बन्दुकधारीपिन्सं गोली चलेयाःगु खः ।

स्थानीय मिडियाया कथं हाकू वसः पुनावःपिं थ्यंमथ्यं नीम्ह स्वीम्ह गोरो युवकपिन्सं सुथय् ११ः३० ता इलय् चर्चदुने दुहां वनाः गोली चलेयाःगु खः ।

प्रहरीया कथं गोली कयाः न्यादँनिसें ७२ दँ उमेर समूहया मनूत सीगु खः । आक्रमणकारीपिन्त नं प्रहरीं स्यानाब्यूगु दु । नीम्ह घाःपाः जूपिन्त हेलिकोप्टरपाखें अस्पताल यंकूगु बीबीसीं बुखँय् न्ह्यथनातःगु दु ।

सामाजिक संजालय् तयातःगु छगू भिडियोय् चर्च पिनेया इलाकायात प्रहरीं घेराबन्दी यानाः तःगु खनेदु ।

प्रान्तया गभर्नर ग्रेग एबटया कथं टेक्सासया इतिहासय् हे थ्व दकले तःधंगु आक्रमण खः । वय्कलं उगु घटनायात घृणित धासें सीपिनिगु छेँजःप्रति समवेदना प्वंकूगु दु ।

जापान भ्रमणय् वनाच्वंम्ह अमेरिकी राष्ट्रपति डोनाल्ड ट्रम्पं ट्वीटरय् च्वयादीगु दु, “भगवान सन्डरल्याण्ड स्प्रिङ्स टेक्सासया जनतायात साथ ब्यु ।”

Categorized in अन्तर्राष्ट्रिय