nepal life

अमिताभ बच्चन व कंगना रनौट नं नेपाः वइगु

नेवा: अनलाइन न्युज – विजयरत्न | २०७४ माघ २९, सोमबार १७:३४:५०

बलिउडया खान स्टारत मध्ये छम्ह सलमान खान नेपालय् वइगु खँ बय् बय् जुयाच्वंगु थ्व इलय् नेपालय् भारतया मेगास्टार अमिताभ बच्चन व एक्टिङ क्वीन धकाः धयातःम्ह कंगना रनौट नं नेपाः वइगु खँ पिहाँ वःगु दु ।

भारतया छम्ह साहसी मिसां थः छपा तुति मदुसां संसारया सर्वोच्च शिखर गःगु बाखनय् दयेकेत्यंगु छगू हिन्दी फिल्मय् कंगना रनौटं उम्ह मिसाया भूमिकाय् म्हितेत्यंगु दुसा उगु फिल्मय् अमिताभ बच्चनया नं छगू मेन रोल दइगु खँया जानकारी ब्यूगु दु ।

अरुणिमा सिन्हा नांयाम्ह उम्ह मिसाया बायोपिकया रुपय् दयेकेत्यंगु उगु फिल्मया नां ‘अरुणिमा ः अः स्टोरी अफ माउण्टेनियर’ धकाः छुनातःगु दुसा थ्व फिल्म आकिवं भारतया गणतन्त्र दिवसया लसताय् जनवरी २०१९ स रिलिज जुइगु खँया जानकारी ब्यूगु दु ।

थुगु फिल्मया निर्देशन भारतया नांजाःम्ह निर्देशक आर. बालकीं याइगु खँ दुसा थ्वसिबें न्ह्यः आर. बालकीं अमिताभ बच्चन व तब्बुया मतिनाया बाखं दूगु ‘चिनी कम’ व अभिषेक बच्चनं अमिताभ बच्चनया अबु जुयाः म्हितातःगु ‘पा’ निर्देशन यायेधुंकूगु दुसा आर. बालकीया निर्देशनय् दयेकूगु अक्षय कुमारया ‘पायडमाएन’ थौंकन्हय् तसकं बय् बय् जुयाच्वंगु हिन्दी फिल्म खः ।

Categorized in कला